web counter
LEXO PA REKLAMA!

SHKARKO APP

App Store
Google Play

E fundit!

x

Pse vetëm Erion Veliaj?

15 Shtator 2026, 18:32, Aktualitet CNA

Pse vetëm Erion Veliaj?

Ka një pyetje që Edi Rama nuk mund t’i shmanget më.

Pse vetëm Erion Veliaj?

Ku ishte kjo mbrojtje e kryeministrit kur u arrestua Lefter Alla? Po kur u arrestua Jorgo Goro? Po Fatos Tushe? Po Shukri Xhelili? Po Vangjush Dako? Pse Tirana qenka “pa kokë” vetëm kur në qeli përfundon Erion Veliaj?

Sepse po të jetë puna te pesha e qytetit, argumenti nuk qëndron. Durrësi nuk është ndonjë fshat pa rëndësi në hartën e Shqipërisë. Durrësi ka qenë dhe mbetet një nga qytetet më të rëndësishme të vendit. Dhe Vangjush Dako, për mirë apo për keq, ka qenë për vite të tëra një nga njerëzit politikisht dhe personalisht më të afërt me Edi Ramën. Për të nuk pamë këtë pathos. Nuk pamë kryeministrin që të dilte të thoshte se Durrësi ishte “pa kokë”. Nuk pamë një fushatë publike për të na shpjeguar se qyteti nuk mund të funksiononte pa kryetarin e bashkisë.

Atëherë çfarë është ndryshe me Erion Veliajn? Mos vallë është vetëm Tirana? Vështirë të besohet.

Sepse Tirana ka pasur kryetarë bashkie para Erion Veliajt dhe do të ketë edhe pas tij. Ka pasur kryetarë që janë larguar nga detyra, kryetarë që janë mundur në zgjedhje, kryetarë që janë hetuar, madje edhe kryetarë që kanë përfunduar në burg. Qyteti ka vazhduar të jetojë. Kështu funksionon një shtet normal. Institucionet dhe banorët nuk janë trupi i një njeriu dhe kryetari i bashkisë nuk është koka e qytetit.

Prandaj këmbëngulja e Ramës për të na shitur idenë e “Tiranës pa kokë” sa herë flitet për Erion Veliajn bëhet gjithnjë e më e çuditshme. Sidomos kur sot, pas vendimit të Gjykatës së Lartë, nuk kemi më një gjykatë që “e mban” Veliajn në qeli. Kemi një proces gjyqësor ku çështja e masës së sigurimit është shqyrtuar nga disa trupa gjykues dhe ku vendimi është marrë nga gjykatat, jo nga prokuroria. Por Edi Rama vazhdon të flasë sikur dikush i ka prerë kokën Tiranës. Për çfarë arsye?

Mund të jetë thjesht sepse Rama e konsideron Erion Veliajn të pazëvendësueshëm. Mund të jetë sepse Tirana ka një peshë politike të jashtëzakonshme. Mund të jetë sepse kështu i leverdis politikisht. Mund të jetë edhe sepse marrëdhënia e tij me Erion Veliajn është shumë më e veçantë nga ajo që ka pasur me kryetarët e tjerë të bashkive.

Por pikërisht këtu fillojnë pyetjet. Edi Rama nuk është i njohur pikërisht për sentimentalizmin e tij në politikë. Përkundrazi. Ka larguar, ka zëvendësuar dhe ka sakrifikuar njerëz të tij politikë sa herë ka menduar se kjo i shërben pushtetit. Nuk ka pasur ndonjëherë problem të madh të ndahet nga dikush kur ai person i bëhet barrë.

Prandaj është e pamundur të mos pyesësh pse, në rastin e Erion Veliajt, kemi një përjashtim kaq spektakolar. Mos vallë ka diçka që e bën Veliajn kaq të rëndësishëm për kryeministrin?

Mos vallë ka interesa politike që nuk shihen nga jashtë?

Mos vallë ka njerëz të tjerë që i kërkojnë Ramës ta mbajë këtë qëndrim?

Apo kemi të bëjmë thjesht me një sentiment të veçantë për “delfinin” politik të kryeministrit?

Nuk ka asgjë të keqe që Edi Rama të ketë bindjen e tij për pafajësinë e Erion Veliajt. Është i lirë të mendojë çfarë të dojë. Por kur kryeministri i vendit del vazhdimisht kundër vendimeve të gjykatave dhe e kthen një masë sigurimi personal në një dramë ekzistenciale për kryeqytetin, atëherë nuk është më thjesht një opinion politik. Është një sjellje që kërkon shpjegim.

Edi Rama një gjë e di shumë mirë. Erion Veliaj nuk është Jezu Krishti dhe qelia e tij nuk është Golgota e Tiranës. As koka e tij nuk është ndonjë relike e shenjtë që qyteti duhet ta presë me ankth të vendoset përsëri mbi supe.

Tirana nuk është pa kokë. Tirana ka 1 milion e ca arsye për të funksionuar edhe pa Erion Veliajn.

Por ajo që mbetet pa përgjigje është një pyetje shumë më e thjeshtë. Çfarë halli ka Edi Rama me kokën e Erion Veliajt?/CNA





Lajmet e fundit nga