Një prej skandaleve më të rënda në historinë e sistemit shëndetësor britanik ka rikthyer në qendër të vëmendjes sigurinë e të porsalindurve në spitale. Pas hetimeve për ngjarjet në Countess of Chester Hospital, ku infermierja Lucy Letby u dënua për vrasjen e shtatë foshnjave dhe tentativën për të vrarë shtatë të tjera, qeveria britanike ka njoftuar masa të reja monitorimi në maternitetet e vendit.
Sipas planit të ri, pranë krevateve të foshnjave në reparte do të vendosen kamera monitoruese, me synimin për të rritur sigurinë dhe për të identifikuar më shpejt çdo situatë të dyshimtë.
Letby u shpall fajtore për vrasjen e shtatë foshnjave dhe tentativën për vrasjen e shtatë të tjerave. Sipas akuzave për të cilat ajo u dënua, infermierja shkaktonte kolaps te foshnjat duke ndërhyrë në mënyrën se si ato merrnin oksigjen.
Në disa raste, ajo u injektonte ajër në enët e gjakut, duke shkaktuar emboli, ndërsa në raste të tjera përdorte insulinë për t’u ulur në mënyrë të rrezikshme nivelin e sheqerit në gjak foshnjave që nuk kishin nevojë për këtë medikament.
Letby po vuan 15 dënime me burgim të përjetshëm, pa mundësi lirimi. Ajo ka kërkuar të apelojë dënimet, por në dy raste i është refuzuar leja për të vijuar procedurat e apelit.
Përveç përgjegjësisë individuale të infermieres, hetimi ka nxjerrë në pah edhe dështime të rënda në menaxhimin e spitalit dhe në mënyrën se si funksiononte sistemi i NHS. Raporti kritikoi drejtuesit për faktin se shqetësimet lidhur me sigurinë e foshnjave nuk u trajtuan me seriozitetin e duhur.
Sipas gjetjeve të hetimit, në disa raste drejtues që kishin dështuar në detyrat e tyre transferoheshin në poste të tjera, në vend që të përballeshin me përgjegjësi për vendimmarrjen e tyre.
Ish-drejtorja ekzekutive e trustit, Susan Gilby, e përshkroi organizatën si “krejtësisht jofunksionale”. Ajo tha se, kur mori detyrën në vitin 2018, kishte frikë se disa prej vdekjeve mund të ishin parandaluar.
Sipas Gilby, siguria e pacientëve duhet të ishte pyetja e parë në çdo vendimmarrje brenda sistemit shëndetësor, por në atë periudhë kjo pyetje nuk ngrihej.
Ndërkohë, Shoqata Mjekësore Britanike ka kërkuar reforma të thella në NHS, duke vënë theksin te forcimi i mekanizmave që mbrojnë mjekët dhe punonjësit shëndetësorë që raportojnë shqetësime për sigurinë e pacientëve.
Vendosja e kamerave në maternitetet britanike është një prej masave të ndërmarra pas këtij skandali, ndërsa autoritetet po përballen me presion për të garantuar që shqetësimet për sigurinë e foshnjave të identifikohen dhe të trajtohen përpara se të çojnë në pasoja të pakthyeshme.