Deputetja e Partisë Socialiste, Zegjine Caushi, ka reaguar pas përfshirjes së dajës së saj, Bledar Bakaj, në ngjarjen e raportuar në fshatin Suk 2, ku 34-vjeçarja Merita Gremaj ka pretenduar se është dhunuar dhe përdhunuar, ndërsa babai i saj ka mbetur i plagosur.
Përmes një deklarate publike, Caushi ka dhënë versionin e saj lidhur me njohjen mes dajës së saj dhe 34-vjeçares, duke theksuar se ka pasur dijeni vetëm për marrëdhënien mes tyre dhe se për ngjarjen e fundit është informuar nga mediat.
Deputetja ka publikuar edhe një fotografi ku shfaqen Bledar Bakaj dhe Merita Gremaj së bashku, duke sqaruar se i ka takuar rastësisht në fillim të muajit qershor, pranë banesës së dajës së saj.
Sipas Caushit, në atë moment në oborr ndodheshin edhe familjarë e fqinjë dhe Gremaj i ishte prezantuar si bashkëjetuesja e Bakajt.
“E urova padyshim për lidhjen e tyre, pasi atë gjë po bënin edhe fqinjët që ishin prezent dhe më pas, si unë, edhe kushëriri im iu drejtuam: ‘E keni ndarë mendjen? Do martoheni?’”, tregon deputetja.
Caushi thotë se 34-vjeçarja i kishte pohuar se kishin vendosur të martoheshin, ndërsa kishte përmendur edhe kundërshtimin e të atit për këtë lidhje.
“Merita Gremaj tha: ‘Po po, i kam marrë parasysh kushtet në të cilat Bledari jeton, edhe pse babai s’e ka me qejf…’”, shkruan deputetja.
Ajo shton se më pas e kishte pyetur në mënyrë të drejtpërdrejtë nëse lidhja mund të sillte probleme me familjen e saj, ndërsa situata, sipas saj, ishte kaluar me të qeshura dhe urime nga personat e pranishëm.
Caushi thekson se qëndrimi i saj lidhet vetëm me atë që ka parë dhe dëgjuar personalisht, ndërsa për ngjarjen e raportuar ditët e fundit thotë se është informuar përmes mediave.
“Ky është i gjithë informacioni që kam pasur dhe kam në lidhje me marrëdhënien e tyre. Për këtë ngjarje jam informuar përmes mediave, njësoj si opinioni publik”, shprehet ajo.
Në vijim të deklaratës, deputetja dënon çdo formë dhune, pavarësisht autorit.
“Dua ta them shumë qartë: dënoj me forcë çdo formë DHUNE, pavarësisht se nga KUSH është ushtruar”, shkruan Caushi.
