Prej 47 ditësh, banorë të Divjakës vijojnë protestën në sheshin e qytetit, kundër projektit të propozuar nga mazhoranca socialiste për ndryshimet territoriale.
Protestuesit kërkojnë që Divjaka të vijojë të jetë bashki më vete, në të njëjtën formë siç është aktualisht, duke kundërshtuar projektin e propozuar dhe atë që ata e cilësojnë si cenim të interesave të qytetarëve të zonës.
Nga sheshi i protestës, banorët i janë drejtuar edhe deputetëve të zonës, duke kërkuar ndërhyrjen dhe mbështetjen e tyre. Në mënyrë të veçantë, ata kanë kërkuar që deputetja e zonës, por edhe deputeti socialist Erjon Braçe, i cili ka marrë tre mandate në Divjakë, të flasin publikisht në mbështetje të kërkesës së tyre.
Protestuesit kanë deklaruar se nuk do të tërhiqen dhe se protesta do të vijojë deri në momentin kur kërkesa e tyre të marrë një përgjigje pozitive.
Në përfundim të protestës, qytetarët kanë marshuar në rrugët e qytetit, duke mbajtur pankarta dhe duke brohoritur slogane në mbështetje të ruajtjes së statusit të bashkisë.
“Divjaka bashki”, “Divjaka e qytetarëve, jo e tradhtarëve”, ishin disa prej sloganeve të protestuesve.
Banorët paralajmërojnë se do të vijojnë protestat, duke kërkuar që Divjaka të mbetet bashki më vete.
