Ujësjellësit përmirësojnë financat, por 53% e shoqërive nuk mbulojnë kostot operative

16 Shtator 2026, 07:20, Ekonomi CNA

Ujësjellësit përmirësojnë financat, por 53% e

Sektori i ujësjellës-kanalizimeve ka përmirësuar treguesit financiarë gjatë vitit 2025, me rritje të aftësisë për të mbuluar kostot e aktivitetit, por më shumë se gjysma e operatorëve vijojnë të mos arrijnë të financojnë nga të ardhurat e tyre kostot e operimit dhe mirëmbajtjes.

Sipas Raportit të Performancës 2025 të Entit Rregullator të Ujit (ERRU), mbulimi i kostove të operimit dhe mirëmbajtjes (O&M) arriti në 116.8%, niveli më i lartë i regjistruar deri tani, nga 107.6% një vit më parë.

Ndërkohë, mbulimi i kostos totale u rrit në 89%, nga 83.2% në vitin 2024. ERRU vlerëson se këto rezultate reflektojnë përmirësimin gradual të qëndrueshmërisë financiare të sektorit, por mbulimi i plotë i kostove mbetet ende një objektiv për t’u arritur.

Përmirësimi i treguesve financiarë u mbështet nga rritja e të ardhurave të gjeneruara nga aktiviteti. Gjatë vitit 2025, të ardhurat e shoqërive ujësjellës-kanalizime u rritën me rreth 1 miliard lekë ose 9%, një ritëm më i lartë se rritja e kostove. Sipas raportit, “raporti ndërmjet të ardhurave dhe kostove u përmirësua, duke ndikuar drejtpërdrejt në rritjen e treguesve të mbulimit të kostove”.

Ajo që bie në sy është se përmirësimi i sektorit në nivel kombëtar nuk është i njëjtë për të gjithë operatorët. Nga 17 shoqëri që operuan gjatë vitit 2025, vetëm 8 arritën të mbulojnë kostot O&M, ndërsa 9 shoqëri ose 53% e totalit vijuan të mos i mbulojnë këto kosto.

Raporti i ERRU-së evidenton se rezultatet e operatorëve më të mëdhenj kanë ndikim të rëndësishëm në performancën e përgjithshme të sektorit. “Performanca financiare e sektorit vijon të ndikohet në masë të konsiderueshme nga rezultatet e operatorëve me peshën më të madhe në sektor”, thuhet në dokument.

Kostot totale të aktivitetit të shoqërive ujësjellës-kanalizime arritën në rreth 13.92 miliardë lekë në vitin 2025, nga 13.67 miliardë lekë një vit më parë, duke shënuar një rritje prej rreth 2%. Rritja u ndikua kryesisht nga shtimi i kostove të amortizimit, provizioneve, kostove financiare dhe zërave të tjerë të lidhur me aktivitetin.

Një nga zërat kryesorë që ka ndikuar në kostot operative ishte puna. Sipas raportit, kostoja e punës u rrit me rreth 245.6 milionë lekë, duke arritur në 6.1 miliardë lekë në vitin 2025.

Kjo ndodhi edhe pse numri i punonjësve në sektor u ul në 7,468 persona, nga 7,616 një vit më parë. ERRU shpjegon se rritja e kostove lidhet kryesisht me “ndryshimet në pagën bazë minimale në shkallë vendi, si dhe me rritjen e pagave për kategori të ndryshme punonjësish, veçanërisht të stafit administrativ”.

Edhe energjia elektrike vijon të jetë një nga kostot kryesore për operatorët. Në vitin 2025, shpenzimet për energjinë u rritën me rreth 85.8 milionë lekë ose 3.5%, duke përbërë rreth 24% të kostove të operimit dhe mirëmbajtjes. /Monitor