Trupi gjykues i Gjykatës së Posaçme të Apelit, që po shqyrton çështjen penale për aferën e incineratorit të Fierit, vendosi me shumicë votash të mërkurën, më 16 shtator, të pranojë kërkesën e prokurorit Dritan Prençi për riçeljen pjesërisht të gjykimit lidhur me ekspertimin e pasurisë së ish-ministrit të Mjedisit, Lefter Koka, i akuzuar për korrupsion, shpërdorim detyre dhe pastrim parash. Gjykata vlerësoi që të administrohen edhe aktet e incineratorëve të Elbasanit dhe Tiranës.
Prokurori Dritan Prençi kërkoi në gjykimin e Shkallës së Parë konfiskimin e pasurive të Kokës, në vlerë ekuivalente me vlerën e korrupsionit të përcaktuar prej ekspertëve. Për arsye se Shkalla e Parë konkludoi në një vlerë më të vogël nga ajo e vlerësuar prej SPAK, prokurori Prençi kërkoi që ajo të rishikohet gjatë gjykimit në Apel.
Ndërkohë, u rrëzua kërkesa tjetër e prokurorit Prençi për riçeljen pjesërisht të hetimit gjyqësor për sigurimin e provave të tjera, kërkesë që ishte kundërshtuar nga avokatët e të pandehurve me argumentin se po kërkoheshin prova që ishin marrë në gjykimin e zhvilluar në Shkallën e Parë. Kryesuesja e trupit gjykues, Tereza Merkaj, bëri me dije se u vlerësua që çështja mund të zgjidhet në gjendjen në të cilën janë aktet dhe, për këtë arsye, nuk u pranua kërkesa e SPAK për riçeljen pjesërisht të hetimit gjyqësor.
Gjykata vendosi ta shtyjë seancën për më 23 shtator, në orën 09:30, për t’u konsultuar me listën e ekspertëve dhe për caktimin e tyre.
Dymbëdhjetë nga pesëmbëdhjetë të akuzuarit për skemën korruptive të koncesionit të incineratorit dhe fushës së plehrave të Fierit janë shpallur fajtorë nga Gjykata e Posaçme e Shkallës së Parë në shtator të vitit 2023. Apeli e riktheu çështjen për rigjykim në dhjetor të vitit 2024, por Gjykata e Lartë e rrëzoi këtë vendimmarrje. Gjykata e Lartë e riktheu çështjen në Apel, duke vlerësuar se ajo duhej të zgjidhej drejtpërdrejt në shkallën e dytë.
Skandali i incineratorëve nisi në vitin 2014 me një vendim të qeverisë “Rama” për të shpallur një emergjencë mjedisore, si justifikim për të dhënë koncesionin e incineratorit të Elbasanit. I njëjti grup kompanish mori më vonë koncesionet e incineratorëve të Fierit dhe Tiranës. Dy duzina zyrtarësh dhe biznesmenësh u akuzuan si të përfshirë, mes tyre ish-ministri i Mjedisit, Lefter Koka, dhe ish-deputeti socialist, Alqi Bllako.
