web counter
LEXO PA REKLAMA!

SHKARKO APP

App Store
Google Play

Vendimi i Hagës për ish-krerët e UÇK-së/ Ali Ahmeti: Me besim në drejtësi, beteja vazhdon në apel

16 Shtator 2026, 13:15, Kosova & Bota CNA

Vendimi i Hagës për ish-krerët e UÇK-së/ Ali Ahmeti:

Kreu i Bashkimit Demokratik për Integrim, Ali Ahmeti, ka reaguar për dënimin me 81 vjet burg të ish-krerëve të UÇK-së. Ahmeti në një reagim në rrjetet sociale shkruan se vendimi i sotëm ishte i padrejtë dhe zhgënjyes.

Më tej ai bën thirrje për maturi dhe unitet, ndërsa shton se nuk duhet rënë në asnjë grackë që synon të krijojë tensione, përçarje apo të njollosë luftën çlirimtare të popullit të Kosovës.

Gjithashtu shton se procesi gjyqësor nuk përfundon sot, pasi beteja do të vazhdojë në apel.

Reagimi i plotë:

Vendimi i sotëm ndaj Hashim Thaçit, Jakup Krasniqit, Kadri Veselit dhe Rexhep Selimit është një vendim që e konsideroj të padrejtë dhe thellësisht zhgënjyes.

Në këto momente të rënda, bëj thirrje për maturi dhe unitet. Nuk duhet të biem në asnjë grackë që synon të krijojë tensione, përçarje apo të njollosë luftën çlirimtare të popullit në Kosovë.

UÇK-ja lindi si përgjigje ndaj shtypjes dhe luftoi për lirinë e Kosovës. Pretendimet e dikurshme për trafikim organesh, që rënduan për vite mbi UÇK-në dhe drejtuesit e saj, nuk u shndërruan në akuza në këtë proces. Po ashtu, sot Gjykata i shpalli të pafajshëm të akuzuarit për krime kundër njerëzimit; dhe potencoi se UÇK kishte pasur objektiv pavarësine e Kosovës, objektiv ky që edhe u arrit. Këto janë fakte që duhet të kujtohen sa herë që dikush përpiqet ta paraqesë UÇK-në si ndërmarrje kriminale.

Aktakuza i ngarkonte Thaçin, Krasniqin, Veselin dhe Selimin me përgjegjësi për një sërë krimesh të pretenduara gjatë viteve 1998-1999. Besojmë se edhe këto akuza do të rrëzohen në procesin e mëtejshëm gjyqësor, ashtu siç nuk u materializuan pretendimet e dikurshme për trafikim organesh.

Procesi nuk përfundon këtu. Besojmë se mbrojtja do ta vazhdojë betejën juridike në Gjykatën e Apelit, duke kundërshtuar gjetjet e shkallës së parë dhe duke kërkuar drejtësi deri në fund.

Lufta e UÇK-së ishte luftë për liri. Historia e Kosovës nuk mund të rishkruhet dhe sakrifica e një populli të tërë nuk mund të vihet në bankën e të akuzuarve.

Me besim në drejtësi, beteja vazhdon në apel! /CNA





Lajmet e fundit nga