Hetimi për ngjarjen e rëndë që përfshiu këngëtarin grek Giorgos Mazonakis po merr një tjetër drejtim, pasi në telefonin e mjekes Ioanna Gaka janë gjetur të dhëna që lidhen me fotografi dhe video të realizuara në klinikë, pak para se këngëtari të pësonte arrest kardiak.

Sipas të dhënave të bëra publike nga mediat greke, nga pajisja e mjekes janë rikuperuar dy fotografi dhe një video të realizuara më 9 shtator, kur Mazonakis ndodhej në klinikën private në Kolonaki për një procedurë plazmafereze. Skedarët rezultojnë të jenë fshirë më vonë.

Një prej fotografive është realizuar në orën 14:43:36. Në të, sipas raportimeve, Mazonakis shfaqet i shtrirë në shtratin e klinikës, me sytë të mbyllur dhe i lidhur me aparaturën e plazmaferezës.

Pak sekonda më vonë, në orën 14:43:55, është regjistruar edhe një video, ndërsa fotografia e dytë është realizuar në orën 14:45:22.

Të tre skedarët janë fshirë disa orë më vonë, por gjurmët e tyre dixhitale janë rikuperuar nga hetuesit. Të dhënat e fotografisë së parë përfshijnë edhe koordinata që e lidhin atë me adresën e klinikës në rrugën Karneadou në Athinë.

Por ajo që ka shtuar pikëpyetjet e hetuesve është fakti se një prej fotografive rezulton të jetë shpërndarë nga telefoni i mjekes drejt një numri tjetër. Identiteti i marrësit nuk është bërë ende i ditur.

Tashmë hetuesit po përpiqen të zbulojnë se kujt iu dërgua fotografia, përmes cilit aplikacion dhe nëse ajo u shoqërua me ndonjë mesazh. Në të njëjtën kohë, po kontrollohen edhe pajisjet e punonjësve të tjerë të klinikës, ndërsa komunikimet e tyre po krahasohen me të dhënat e gjetura në telefonin e mjekes.

Fotografitë kanë hapur gjithashtu pyetje të reja për atë që ka ndodhur gjatë procedurës. Në një prej tyre, këngëtari shihet i lidhur me aparaturën, ndërsa hetuesit po shqyrtojnë kronologjinë e saktë të minutave që i paraprinë arrestimit kardiak.

Çështja është edhe më serioze pasi mjekja Ioanna Gaka dhe bashkëshorti i saj, mjeku Ilias Theodoropoulos, janë përfshirë në hetim dhe përballen me akuza të rënda lidhur me vdekjen e këngëtarit. Megjithatë, përgjegjësia penale dhe rrethanat e sakta të ngjarjes mbeten ende objekt i hetimit.

Paralelisht, autoritetet po presin edhe rezultatet e analizave toksikologjike, ndërsa një nga pistat që po verifikohet lidhet me mundësinë e administrimit të ndonjë substance përpara ose gjatë procedurës. Deri tani nuk është bërë e ditur një substancë konkrete.

Hetuesit po përpiqen kështu të rindërtojnë minutë pas minute atë që ka ndodhur në klinikën e Kolonakit, ndërsa telefoni i mjekes është kthyer në një nga provat kryesore dixhitale të çështjes.

Lini një Përgjigje

VIDEO/ Situatë e sikletshme, atletja australiane pëson diarre gjatë garës dhe shkakton debat të madh, organizatorët kërkojnë falje

17:00 Lifestyle 2 komente

Soni Malaj ‘ndez’ rrjetin nga pushimet, shfaqet në super formë me bikini

15:52 Lifestyle 3 komente

Demi 540 kg e kap mes brirëve dhe e zvarrit nëpër arenë, “Messi” i toreadorëve bën të pabesueshmen (Video Virale)

14:52 Lifestyle 5 komente