Haga dënoi krerët e UÇK, reagon Albin Kurti: Padrejtësi e papranueshme! Të korrigjohet në apel

Pas aktgjykimit të Dhomave të Specializuara të Kosovës në Hagë ndaj katër ish-krerëve të Ushtrisë Çlirimtare të Kosovës, kryeministri i Kosovës, Albin Kurti, ka reaguar duke e cilësuar vendimin si të padrejtë. Hashim Thaçi, Kadri Veseli, Jakup Krasniqi dhe Rexhep Selimi u dënuan me gjithsej 81 vite burgim për akuza për krime lufte.

Ish-presidenti Hashim Thaçi është dënuar me 25 vite burgim, Jakup Krasniqi me 25 vite, Kadri Veseli me 18 vite, ndërsa Rexhep Selimi me 13 vite burgim. Në reagimin e tij, Kurti ka thënë se aktgjykimi nuk duhet të shihet si përfundimtar dhe ka shprehur pritjen që ai të shqyrtohet dhe të korrigjohet në shkallën e apelit.

Sipas Kurtit, edhe pse aktgjykimi është shqiptuar formalisht në emër të popullit të Kosovës, kjo, nuk duhet të interpretohet si shprehje e vullnetit të qytetarëve të Kosovës.

“Ky aktgjykim patjetër duhet ndryshuar dhe korrigjuar në shkallën e apelit dhe më parë”, ka deklaruar Kurti, duke shprehur njëkohësisht mbështetjen për familjet e ish-krerëve të UÇK-së dhe bashkëluftëtarët e tyre.

Në reagimin e tij, kryeministri i Kosovës i është referuar edhe historikut të procesit që çoi në themelimin e Dhomave të Specializuara.

Kurti ka përmendur debatet në Këshillin e Evropës dhe akuzat e ngritura ndër vite ndaj UÇK-së, duke theksuar veçanërisht pretendimet për “Shtëpinë e Verdhë” dhe trafikimin e organeve. Sipas tij, këto pretendime nuk janë ngritur nga vetë Prokuroria në formën e akuzave, për shkak të mungesës së provave të mjaftueshme.

Ai ka argumentuar gjithashtu se aktgjykimi i sotëm nuk e ka mbështetur pretendimin se UÇK-ja kishte kryer një sulm të gjerë dhe sistematik kundër një popullsie civile.

Kurti ka theksuar se procesi gjyqësor, sipas tij, nuk duhet të interpretohet si gjykim i legjitimitetit apo i karakterit të përgjithshëm të luftës së UÇK-së.

Ai ka thënë se përfundimet dënuese lidhen me akuza të caktuara për krime lufte, përfshirë torturën dhe trajtimin e personave të konsideruar bashkëpunëtorë të regjimit serb.

“Përfundimet dënuese lidhen me akuza të caktuara për krime lufte, përfshirë torturën e personave të konsideruar bashkëpunëtorë të regjimit serb”, ka shkruar Kurti, duke shtuar se këto përfundime, sipas tij, nuk janë përfundimtare dhe do t’i nënshtrohen shqyrtimit në apel.

Kurti ka bërë të ditur se Qeveria e Kosovës do të vazhdojë mbështetjen institucionale për katër të dënuarit gjatë procedurës së apelit.

“Siç kemi bërë prej fillimit të këtij procesi, Qeveria do të vazhdojë, me të gjitha mjetet që i ka në dispozicion, t’i mbështesë të akuzuarit në procesin e apelit”, ka deklaruar Kurti.

Kurti ka deklaruar se UÇK-ja lindi si përgjigje ndaj shtypjes dhe se karakteri i saj historik, sipas tij, nuk mund të ndryshohet nga një proces gjyqësor.

 “UÇK-ja nuk ishte zgjedhja e një populli që kërkonte luftë, por përgjigjja e një populli që, i shtypur dhe i kërcënuar në vetë ekzistencën e tij, kërkonte liri”, ka shkruar Kurti.

Ai ka theksuar se asnjë vuajtje njerëzore nuk duhet mohuar apo zvogëluar, por ka kundërshtuar që përgjegjësia për veprime të caktuara të përdoret, sipas tij, për të gjykuar në tërësi luftën e UÇK-së.

Në reagimin e tij, Kurti ka kritikuar edhe mënyrën e funksionimit dhe mandatit të Dhomave të Specializuara.

Ai ka thënë se institucioni është përqendruar në përgjegjësinë penale të pjesëtarëve të një pale të luftës, ndërsa krimet e kryera nga aparati shtetëror serb, sipas tij, nuk janë trajtuar në të njëjtin kuadër juridik.

“Kur në bankën e të akuzuarve gjenden vetëm pjesëtarët e një etnie, ndërsa aparati shtetëror që kreu masakra, dëbime dhe krime gjenocidale mbetet jashtë juridiksionit, krijohet në mënyrë të pashmangshme pamja e një drejtësie njëetnike”, ka shkruar Kurti.

Ai ka ngritur shqetësime edhe lidhur me transparencën e procesit, duke argumentuar se zhvillimi i pjesëve të procedurës larg publikut ka ndikuar në perceptimin për institucionin.

Sipas Kurtit, një mekanizëm ku përgjegjësia penale përqendrohet vetëm te pjesëtarët e një komuniteti, ndërsa krimet e palës tjetër nuk ndiqen në të njëjtin juridiksion, ngre çështje mbi barazinë para ligjit dhe perceptimin e paanshmërisë.

Në përmbyllje të reagimit, Kurti ka përsëritur se institucionet e Kosovës do të vazhdojnë mbështetjen për Hashim Thaçin, Kadri Veselin, Rexhep Selimin dhe Jakup Krasniqin në procedurën e apelit.

“Kosova do të vazhdojë të mbështesë Hashim Thaçin, Kadri Veselin, Rexhep Selimin e Jakup Krasniqin në procedurën e apelit, në mbrojtje të plotë, dinjitoze dhe institucionale”, ka deklaruar ai.

Aktgjykimi ndaj katër ish-krerëve të UÇK-së nuk është përfundimtar dhe palët kanë të drejtë ta kundërshtojnë atë përmes procedurave të apelit.