Furnizimi me ujë të pijshëm është ndërprerë që prej orës 13:00 në qytetet Berat dhe Kuçovë, si dhe në disa prej fshatrave përreth që furnizohen nga ujësjellësi i Bogovës.
Shkak për ndërprerjen është bërë çarja e tubacionit qendror të linjës kryesore të Bogovës, në zonën e fshatit Kakruk.
Sipas burimeve nga Sh.A. Ujësjellës-Kanalizime Berat-Kuçovë, pas konstatimit të defektit, grupet e punës kanë mbërritur në vendin e dëmtimit dhe kanë nisur ndërhyrjen për riparimin e tubacionit.
Punimet synojnë rikthimin sa më shpejt të furnizimit me ujë të pijshëm për banorët e Beratit, Kuçovës dhe fshatrave që marrin ujë nga kjo linjë.
Edhe Bashkia Berat ka reaguar për situatën përmes një njoftimi në faqen zyrtare në Facebook, ku ka bërë me dije qytetarët për shkakun e ndërprerjes së furnizimit.
Autoritetet pritet të njoftojnë për përfundimin e punimeve dhe rikthimin e furnizimit me ujë sapo defekti të jetë riparuar.