Vendimi i Dhomave të Specializuara të Kosovës në Hagë ndaj ish-krerëve të UÇK-së ka shkaktuar reagime të shumta edhe në radhët e artistëve shqiptarë.
Pas shpalljes së dënimeve për Hashim Thaçin, Kadri Veselin, Rexhep Selimin dhe Jakup Krasniqin, disa prej emrave të njohur të muzikës kanë shprehur publikisht qëndrimet e tyre përmes rrjeteve sociale.
Elvana Gjata ishte ndër personazhet që reagoi më gjatë, duke e cilësuar vendimin si një padrejtësi dhe duke shprehur solidaritet me familjet e prekura nga lufta në Kosovë.
“Sot më dhemb Kosova”, shkroi këngëtarja, duke kujtuar viktimat dhe sakrificat e luftës. Ajo theksoi gjithashtu se, sipas saj, lufta e UÇK-së lidhej me përpjekjen për liri dhe mbijetesë.
Reagim pati edhe Ylli Limani. Këngëtari kundërshtoi vendimin dhe tha se historia e Kosovës nuk mund të ndryshohet nga një aktgjykim.
“Se di qysh e mban toka këtë padrejtësi!”, shkroi Limani, duke e lidhur reagimin e tij me atë që e konsideron trajtim të pabarabartë të palëve në konflikt.
Më i shkurtër ishte reagimi i Xhensila Myrtezajt. Përmes një postimi, ajo e cilësoi vendimin si “turpin më të madh” dhe kërkoi “Liri për çlirimtarët”.
Edhe Capital T zgjodhi një mesazh të shkurtër për të shprehur qëndrimin e tij.
“Jo në emrin tim. Jo në emrin e popullit të Kosovës”, shkroi reperi.
Ndërkohë, Alban Skenderaj e përshkroi vendimin si një moment që i shkaktoi revoltë dhe trishtim. Në reagimin e tij, këngëtari tha se dënimi, sipas tij, prek jo vetëm personat e gjykuar, por edhe mënyrën se si lufta e UÇK-së kujtohet në historinë e Kosovës.
“Sot jam i revoltuar. Jam i lënduar. Dhe mbi të gjitha, nuk dua të hesht!”, shkroi Skenderaj, duke bërë thirrje për protesta kundër vendimit.
Në aktgjykimin e shpallur në Hagë, Trupi Gjykues i shpalli të katër ish-krerët e UÇK-së fajtorë për disa akuza për krime lufte, ndërsa i shpalli të pafajshëm për akuzat për krime kundër njerëzimit.
Thaçi dhe Krasniqi u dënuan me nga 25 vite burgim, Veseli me 18 vite dhe Selimi me 13 vite, duke u llogaritur edhe koha e kaluar në paraburgim.
