Ish-emisari amerikan për dialogun Kosovë-Serbi, Richard Grenell, ka reaguar ashpër pas aktgjykimit të Dhomave të Specializuara të Kosovës ndaj ish-presidentit Hashim Thaçi dhe tre ish-krerëve të tjerë të Ushtrisë Çlirimtare të Kosovës.
Thaçi është dënuar me 25 vjet burgim, ndërsa Jakup Krasniqi me 25 vjet, Kadri Veseli me 18 vjet dhe Rexhep Selimi me 13 vjet burgim.
Në një reagim të publikuar pas shpalljes së aktgjykimit, Grenell e ka cilësuar dënimin ndaj Thaçit si “skandaloz” dhe ka kritikuar mënyrën e funksionimit të gjykatave ndërkombëtare.
“Dënimi i shpallur nga Gjykata e Hagës ndaj Hashim Thaçit, për një luftë të 25 vjetëve më parë, është skandaloz”, ka shkruar Grenell.
Ai ka vijuar me kritikat ndaj institucioneve ndërkombëtare të drejtësisë, duke pretenduar se në to merren vendime me karakter politik.
“Askush nuk është i sigurt nga këto gjykata ndërkombëtare, ku elitat akademike marrin vendime politike”, ka shkruar ai.
Grenell ka kritikuar gjithashtu trupin gjykues dhe prokurorinë, duke përmendur në mënyrë të veçantë gjyqtarin zviceran Guénaël Mettraux.
“Gjyqtari zviceran Guenael Mettraux ishte udhëheqësi i vërtetë, duke injoruar çështjet ligjore dhe duke zgjedhur në vend të tyre politikën e Jack Smithit”, ka deklaruar Grenell.
Në reagimin e tij, ish-emisari amerikan ka kërkuar gjithashtu ndërprerjen e financimit për gjykata të tilla, duke iu drejtuar Departamentit amerikan të Drejtësisë dhe zëvendësprokurorit të Përgjithshëm, Todd Blanche.
“Të gjitha këtyre gjykatave duhet t’u ndërpritet menjëherë financimi. Departamenti i Drejtësisë dhe Todd Blanche duhet të veprojnë shpejt. Amerikanët po paguajnë për këto ndjekje politike dhe kjo duhet të ndalet”, ka shkruar ai.
Në fund të reagimit, Grenell i është drejtuar kryeministrit të Kosovës, Albin Kurti, dhe deputetëve të Kuvendit, duke kërkuar që të ndërmerren hapa për shpërbërjen e Dhomave të Specializuara.
“Albin Kurti gjithashtu duhet të veprojë shpejt për ta shpërbërë këtë Gjykatë të huaj. Anëtarët e Parlamentit duhet të punojnë me Kurtin që kjo të ndodhë. Kosovës nuk i duhet një gjykatë në Holandë”, ka përfunduar Grenell.
Deklaratat e Richard Grenellit përbëjnë qëndrimin e tij personal ndaj aktgjykimit dhe funksionimit të Dhomave të Specializuara, ndërsa vendimi i shpallur në Hagë është i shkallës së parë dhe mund të ankimohet.