Puna me kohë të pjesshme është një alternativë për njerëzit që nuk mund të angazhohen me orar të plotë, duke u krijuar mundësi të kombinojnë punësimin me studimet, kujdesin për familjen apo angazhime të tjera. Në këtë kategori përfshihen studentët, personat që kërkojnë një punë të dytë, si dhe prindërit që kanë nevojë për më shumë fleksibilitet gjatë ditës.
Por sa e përhapur është kjo formë punësimi në Shqipëri dhe si ka ndryshuar gjatë muajve të fundit?
Sipas të dhënave të INSTAT, në tremujorin e dytë të vitit 2026, të punësuarit me kohë të pjesshme përbënin 11.3% të të punësuarve kundrejt të punësuarve me pagë gjithsej. Ky tregues shënoi një ulje prej 1.5 pikë përqindjeje krahasuar me tremujorin e parë, kur pjesa e të punësuarve me orar të reduktuar ishte 12.8%.
Kjo do të thotë se, gjatë tremujorit të dytë, një pjesë më e vogël e të punësuarve me pagë punonin me orar të pjesshëm në raport me fillimin e vitit. Megjithatë, të dhënat e INSTAT nuk tregojnë nëse kjo rënie lidhet me kalimin e punonjësve në orar të plotë, ndryshimin e kërkesës për punë me kohë të pjesshme apo faktorë të tjerë të tregut të punës.
Tendenca në rënie vihet re edhe në krahasimin me të njëjtën periudhë të vitit të kaluar. Në tremujorin e parë të vitit 2025, të punësuarit me kohë të pjesshme përbënin 13.1% kundrejt të punësuarve me pagë gjithsej, ndërsa në tremujorin e dytë të po atij viti treguesi zbriti në 12.6%.
Nëse krahasojmë tremujorin e dytë të vitit 2026 me të njëjtin tremujor të vitit 2025, pesha e të punësuarve me kohë të pjesshme ka rënë me 1.3 pikë përqindjeje. Kjo tregon se, krahasuar me një vit më parë, kjo formë punësimi përfaqëson një pjesë më të vogël të punësimit me pagë.
Pavarësisht uljes së përgjithshme, diferencat mes grave dhe burrave mbeten të dukshme. Sipas statistikave të INSTAT për grupmoshën 15–64 vjeç, gjatë tremujorit të dytë të vitit 2026, 15.5% e femrave të punësuara me pagë punonin me kohë të pjesshme, kundrejt 7.7% të meshkujve./Scan.tv
