Ish-Presidenti i Shqipërisë, Rexhep Meidani, ka reaguar pas vendimit të Dhomave të Specializuara në Hagë ndaj Hashim Thaçit, Kadri Veselit, Rexhep Selimit dhe Jakup Krasniqit, të cilët u dënuan në total me 81 vite burg.
Në reagimin e tij, Meidani ka shprehur rezerva të forta ndaj mënyrës se si është zhvilluar procesi gjyqësor, duke vënë në pikëpyetje përfaqësimin e Kosovës në këtë proces.
Sipas tij, fakti që trupi gjykues nuk përbëhet nga gjyqtarë nga Kosova dhe se procesi nuk është zhvilluar në territorin e saj ngre pikëpyetje për mënyrën se si përfaqësohet vullneti i popullit të Kosovës.
“Aktgjykimi është i shkallës së parë; procesi vazhdon. Drejtësia e munguar duhet të jepet! Por, ama, duhet ta përfaqësojë vullnetin e popullit të Kosovës, jo ta zhgënjejë atë”, është shprehur Meidani.
Duke iu referuar periudhës së luftës në Kosovë, ish-Presidenti ka theksuar se Shqipëria, gjatë viteve të presidencës së tij, kishte hapur kufijtë për shqiptarët e Kosovës të dëbuar nga forcat e regjimit të Slobodan Millosheviçit.
Meidani ka argumentuar gjithashtu se, sipas tij, konteksti historik i luftës nuk duhet të lihet jashtë vlerësimit të zhvillimeve gjyqësore. Ai e përshkruan Kosovën si viktimë të dhunës së shtetit serb dhe thekson se përgjegjësia individuale, nëse provohet, nuk duhet të përdoret për të relativizuar këtë kontekst.
Në reagimin e tij, Meidani ka mbrojtur gjithashtu figurën e katër ish-krerëve të UÇK-së, duke thënë se i ka njohur personalisht dhe se nuk i konsideron persona të aftë për veprimtari kriminale.
“Personalisht mendoj se asnjë vendim gjyqësor nuk mund t’ua heqë vendin që zënë Hashim Thaçi, Kadri Veseli, Jakup Krasniqi dhe Rexhep Selimi në një nga kapitujt më të ndritur të historisë sonë kombëtare”, shkruan ai.
Meidani ka deklaruar se procesi duhet të vijojë përmes të gjitha shkallëve ligjore dhe ka bërë thirrje që vendimet të kundërshtohen përmes mjeteve që parashikon ligji.
Në fund të reagimit, ai i është drejtuar edhe institucioneve të Kosovës, duke argumentuar se Kuvendi duhet të mbajë qëndrim lidhur me mënyrën se si Gjykata Speciale flet në emër të popullit të Kosovës.
“Prandaj besoj se këto dënime duhet të kundërshtohen deri në shkallën e fundit, me çdo mjet ligjor në dispozicion”, përfundon Meidani.
