Atletico Madridi duket se ka ndryshuar qëndrim sa i përket së ardhmes së Julian Alvarez-it. Sipas raportimeve nga Spanja, klubi madrilen ka bërë një lloj marrëveshjeje me sulmuesin argjentinas, e cila mund t’i hapë rrugën largimit të tij në fund të sezonit.

Sipas gazetarit Pipi Estrada, drejtori ekzekutiv i Atleticos, Miguel Angel Gil Marín, i ka premtuar Alvarezit se do të ulë klauzolën e tij të largimit nëse sulmuesi arrin të shënojë më shumë se 20 gola gjatë këtij sezoni.

Një lëvizje e tillë do ta lehtësonte ndjeshëm një transferim të mundshëm verën e ardhshme. Në mesin e klubeve të interesuara për argjentinasin përmenden Arsenali dhe, mbi të gjitha, Barcelona.

Raportime të tjera nga mediat spanjolle, përfshirë gazetarë pranë klubit katalanas, konfirmojnë se qëndrimi i Atleticos për një shitje të mundshme të Alvarezit është zbutur. Kjo vjen pas një periudhe të tensionuar mes sulmuesit dhe klubit pas mbylljes së merkatos.

Megjithatë, situata duket se është normalizuar gradualisht. Përkushtimi i Alvarezit në stërvitje dhe paraqitja e tij në transfertën ndaj Liverpoolit në “Anfield” janë vlerësuar veçanërisht nga drejtuesit e Atleticos.

Madje, Gil Marín raportohet se e ka telefonuar personalisht argjentinasin pas ndeshjes për ta përgëzuar për nivelin e treguar dhe qëndrimin e tij, pavarësisht humbjes.

Për momentin, ish-sulmuesi i Manchester City-t mbetet një nga lojtarët kryesorë në projektin e Diego Simeones. Megjithatë, një golashënues i suksesshëm këtë sezon mund të ndikojë në uljen e klauzolës së tij dhe të krijojë kushtet për një largim në verë.

Në ndeshjen ndaj Osasunës, Alvarez nuk ishte as në stol, por mungesa e tij lidhet me një dëmtim.