Më shumë se 10 orë pas shpalljes së vendimit të Dhomave të Specializuara në Hagë ndaj ish-krerëve të UÇK-së, qindra qytetarë janë mbledhur në qendër të Prishtinës.
Protestuesit janë grumbulluar në sheshin kryesor të kryeqytetit dhe pranë godinës së Qeverisë së Kosovës, duke kërkuar një reagim më të fortë nga institucionet lidhur me vendimin e gjykatës.
Për një pjesë të qytetarëve, vendimi ndaj ish-drejtuesve të UÇK-së konsiderohet i padrejtë, ndërsa tubimi vijon me kërkesa drejtuar institucioneve të Kosovës.
Përgjatë protestës, godina e Qeverisë është rrethuar nga një numër i madh efektivësh policie. Situata raportohet përgjithësisht e qetë, megjithëse në disa momente drejt godinës janë hedhur kapsolla.
Sipas raportimeve, këto incidente nuk kanë shkaktuar probleme për forcat e rendit, ndërsa prania e policisë vijon të jetë e shtuar në zonën përreth.
