Ish-presidenti i Shqipërisë gjatë periudhës së luftës në Kosovë, Rexhep Meidani, ka reaguar pas aktgjykimit të Dhomave të Specializuara në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit, të cilët u dënuan në total me 81 vite burgim.
Meidani e ka vënë theksin te roli dhe përbërja e Gjykatës Speciale, duke ngritur pyetjen se në emër të kujt jepet një vendim i tillë, kur, sipas tij, populli i Kosovës nuk ka përfaqësim në trupin gjykues dhe po proteston kundër vendimit.
“Kam qenë President i Republikës në vitet e vështira kur Shqipëria dhe populli i saj hapën kufijtë dhe zemrën për vëllezërit e tyre shqiptarë të Kosovës që po dëboheshin nga shtëpitë dhe trojet e tyre nga milicët dhe paraushtarakët e regjimit represiv të Millosheviçit. E kam ndjerë këtë represion qysh prej viteve si pedagog i Universitetit të Prishtinës, sidomos në vitin 1981 e më pas, kur jo vetëm nuk u lejuam për të vazhduar leksionet tona, por dhe na u bënë tepër të vështira kontaktet dhe komunikimet me studentët tanë”, shprehet Meidani.
Duke kujtuar periudhën e luftës në Kosovë, ai tha se e kishte përjetuar nga afër represionin e regjimit të Slobodan Millosheviçit ndaj shqiptarëve të Kosovës.
“Aktgjykimi i sotëm në Hagë mban emrin e popullit të Kosovës, por asnjë gjyqtar i atij trupi gjykues nuk i përket Kosovës e nuk e kupton atë, dhe seanca nuk u mbajt as në tokën e saj. Kjo është pyetja që më mundon më shumë se vetë numri i tejzgjatur, pa arsye, i viteve. Në fakt, në ç’emër flet një gjykatë e tillë, kur populli që ajo pretendon ta përfaqësojë s’ka zë e peshë brenda saj, por proteston jashtë saj apo në sheshet e Kosovës?”, shkruan ish-presidenti.
Meidani thekson se aktgjykimi është i shkallës së parë dhe se procesi gjyqësor vijon, ndërsa kërkon që drejtësia, sipas tij, të përfaqësojë vullnetin e qytetarëve të Kosovës.
“Aktgjykimi është i shkallës së parë; procesi vazhdon. Drejtësia e munguar duhet të jepet! Por, ama, duhet ta përfaqësojë vullnetin e popullit të Kosovës, jo ta zhgënjejë atë”, shprehet ai.
Më tej, ish-presidenti shqiptar e cilëson të padiskutueshëm kontekstin historik të luftës në Kosovë, duke argumentuar se Kosova dhe populli i saj ishin viktima të dhunës së shtetit serb.
“Ajo që nuk vazhdon të diskutohet është konteksti historik: Kosova dhe populli i saj ishin viktimë e dhunës së shtetit serb, jo palë e barabartë me agresorin. Përgjegjësia individuale, nëse do të kishte, assesi nuk mund ta relativizojë atë fakt, as të vërë në pikëpyetje lirinë dhe pavarësinë që Kosova i fitoi me çmim të jetëve njerëzore, veçanërisht të rinjve të saj”, shkruan Meidani.
Ai ka deklaruar gjithashtu se, pavarësisht vendimit gjyqësor, katër ish-krerët e UÇK-së do të mbeten, sipas tij, pjesë e rëndësishme e historisë kombëtare shqiptare.
“Personalisht mendoj se asnjë vendim gjyqësor nuk mund t’ua heqë vendin që zënë Hashim Thaçi, Kadri Veseli, Jakup Krasniqi dhe Rexhep Selimi në një nga kapitujt më të ndritur të historisë sonë kombëtare. Në atë kohë, kur liria e Kosovës dhe paqja e rajonit ishin ende një ideal pa siguri, ata guxuan të merrnin mbi supe barrën historike për ta sjellë lirinë te populli i tyre, në një moment kur çdo gjë rrezikohej e asnjë sukses nuk ishte i garantuar”, shprehet ai.
Meidani thotë se gjatë periudhës së luftës i ka njohur Thaçin, Veselin, Krasniqin dhe Selimin si drejtues të UÇK-së, ndërsa kundërshton përshkrimin e tyre si persona të aftë për veprimtari kriminale.
“Unë e pashë atë rrezik nga afër, në kohën time si President, në pamjet e trishtueshme të dëbimeve me forcë dhe vrasjeve masive. Po ashtu, i kam njohur ata si djem, si luftëtarë e udhëheqës trima, me emocionin rinor dhe gatishmërinë për sakrificë, dhe aspak si njerëz të aftë për veprimtari kriminale, që u përshkruhen sot”, shkruan ish-presidenti.
Në pjesën e fundit të reagimit të tij, Meidani kërkon që dënimet të kundërshtohen përmes mjeteve ligjore të ankimit dhe shprehet se Kuvendi i Kosovës duhet të marrë një qëndrim institucional për të ardhmen e Gjykatës Speciale.
“Prandaj besoj se këto dënime duhet të kundërshtohen deri në shkallën e fundit, me çdo mjet ligjor në dispozicion. Madje, Kuvendi i Kosovës ka detyrimin të vendosë që kjo gjykatë, në formën e sotme, nuk meriton të vazhdojë të flasë në emër të një populli që s’e njeh si të vetin”, përfundon Meidani.
Aktgjykimi ndaj katër ish-krerëve të UÇK-së është i shkallës së parë dhe mund të ankimohet në instancat përkatëse.