Zëvendëskryeministri i Malit të Zi dhe Kreu i Forumit Shqiptar në Malin e Zi, Nik Gjeloshaj, ka reaguar pas aktgjykimit të shkallës së parë të Dhomave të Specializuara të Kosovës në Hagë ndaj ish-krerëve të Ushtrisë Çlirimtare të Kosovës, duke e cilësuar vendimin si “jashtëzakonisht të padrejtë”.
Gjeloshaj shprehet se vendimi mund të jetë një “ditë zie për shqiptarët”, por thekson se qëndrimi i të akuzuarve dhe mundësia e apelimit duhet të shërbejnë si forcë për përballimin e kësaj situate.
“Kjo mund të jetë ditë zie për shqiptarët, por qëndrimi dinjitoz i të akuzuarve i jep forcë popullit shqiptar që ta përballojë këtë dhimbje, me besimin se ky aktgjykim i tmerrshëm do të rrëzohet në instancat më të larta”, shkruan ai.
Duke iu referuar procesit gjyqësor, Gjeloshaj nënvizon se vendimi nuk është përfundimtar dhe shpreh bindjen e tij se në përfundim të të gjitha procedurave do të dëshmohet pafajësia e të akuzuarve.
“Ky është vendim i shkallës së parë dhe procesi gjyqësor nuk ka përfunduar. Besojmë se, deri në përfundimin e plotë të procesit, do të dëshmohet pafajësia e të gjithëve”, shprehet kreu i Forumit Shqiptar.
Gjeloshaj mbron gjithashtu karakterin e luftës së UÇK-së, të cilën e përshkruan si “vetëmbrojtëse, çlirimtare dhe të drejtë”, duke theksuar se ajo, sipas tij, ishte një luftë për mbijetesën, lirinë dhe shtetin e Kosovës.
“Lufta e UÇK-së ishte vetëmbrojtëse, çlirimtare dhe e drejtë. Ishte luftë për mbijetesën, lirinë dhe shtetin e Kosovës, e përkrahur nga aleatët tanë perëndimorë. Agresori nuk mund dhe nuk duhet të barazohet me atë që është detyruar të mbrohet”, shkruan ai.
Në reagimin e tij, Gjeloshaj thekson gjithashtu se ish-krerët e UÇK-së i janë përgjigjur institucioneve ndërkombëtare dhe nuk janë larguar apo fshehur gjatë procesit.
“Shqiptarët dhe vetë të akuzuarit i kanë respektuar institucionet ndërkombëtare. Ata as nuk kanë ikur, as nuk janë fshehur, por janë paraqitur para drejtësisë dhe do ta vazhdojnë betejën e tyre ligjore deri në fund”, shprehet ai.
Kreu i Forumit Shqiptar përmend në reagimin e tij edhe figurën e komandantit Adem Jashari, duke e lidhur UÇK-në dhe mbështetjen amerikane me rrugën e Kosovës drejt lirisë dhe pavarësisë.
“Çdo shqiptar e ka në zemër luftën e shenjtë të UÇK-së dhe komandantin legjendar Adem Jashari. Çdo shqiptar beson në pafajësinë e tyre! Liria dhe pavarësia kanë një vulë: UÇK-ja dhe Amerika!”, shkruan Gjeloshaj.
Në fund të reagimit, ai i është përgjigjur edhe debateve të krijuara rreth një deklarate të mëparshme të tij, duke pretenduar se fjalët e tij janë nxjerrë jashtë kontekstit.
“Nuk ia vlen të komentohet nxjerrja e një deklarate sime nga konteksti dhe manipulimi me të. Biseda ishte për respektimin e vendimeve të gjykatave ndërkombëtare nga shqiptarët, për dallim nga qëndrimi i palës tjetër”, sqaron ai.
Gjeloshaj thotë se nuk ka besuar se gjykatat ndërkombëtare mund të bëjnë padrejtësi, por sjell si shembull rastin e gjeneralit kroat Ante Gotovina, i cili u shpall fajtor në shkallën e parë dhe më pas u lirua në apel.
“Edhe Ante Gotovina përjetoi padrejtësi në shkallën e parë, por në shkallën e dytë fitoi drejtësia. Besojmë deri në fund; beteja për drejtësi vazhdon!”, përfundon Nik Gjeloshaj.
POSTIMI I PLOTË
“Lajm shumë i keq dhe një vendim jashtëzakonisht i padrejtë!
Sot mund të jetë ditë zie për shqiptarët, por qëndrimi dinjitoz i të akuzuarve i jep forcë popullit shqiptar që ta përballojë këtë dhimbje, me besimin se ky aktgjykim i tmerrshëm do të rrëzohet në instancat më të larta.
Nuk kam besuar kurrë se një vendim gjyqësor mund të ishte i tillë dhe kaq i padrejtë. Ky është vendim i shkallës së parë dhe procesi gjyqësor nuk ka përfunduar. Besojmë se, deri në përfundimin e plotë të procesit, do të dëshmohet pafajësia e të gjithëve.
Lufta e UÇK-së ishte vetëmbrojtëse, çlirimtare dhe e drejtë. Ishte luftë për mbijetesën, lirinë dhe shtetin e Kosovës, e përkrahur nga aleatët tanë perëndimorë. Agresori nuk mund dhe nuk duhet të barazohet me atë që është detyruar të mbrohet.
Shqiptarët dhe vetë të akuzuarit i kanë respektuar institucionet ndërkombëtare. Ata as nuk kanë ikur, as nuk janë fshehur, por janë paraqitur para drejtësisë dhe do ta vazhdojnë betejën e tyre ligjore deri në fund.
Çdo shqiptar e ka në zemër luftën e shenjtë të UÇK-së dhe komandantin legjendar Adem Jashari. Çdo shqiptar beson në pafajësinë e tyre!
Liria dhe pavarësia kanë një vulë: UÇK-ja dhe Amerika!
P.S.
Nuk ia vlen të komentohet nxjerrja e një deklarate sime nga konteksti dhe manipulimi me të. Biseda ishte për respektimin e vendimeve të gjykatave ndërkombëtare nga shqiptarët, për dallim nga qëndrimi i palës tjetër.
Kurrë nuk kam besuar se gjykatat ndërkombëtare mund të bëjnë padrejtësi. Edhe Ante Gotovina përjetoi padrejtësi në shkallën e parë, por në shkallën e dytë fitoi drejtësia.
Besojmë deri në fund; beteja për drejtësi vazhdon!”