Policia e Shtetit ka ekzekutuar mbrëmjen e sotme dy urdhër-arreste në kuadër të një hetimi të Prokurorisë së Fierit për një çështje që lidhet me dokumentet e pronësisë në zonën e Semanit.
Në pranga kanë përfunduar ish-kreu i Kadastrës, Ertis Shehu, si dhe Kastriot Hasko, pronar tokash, i cili është përmendur më herët në media edhe për një konflikt pronësie në Palasë.
Sipas informacioneve paraprake, të dy personat kanë qenë nën hetim prej disa muajsh, ndërsa urdhër-arrestet janë ekzekutuar gjatë mbrëmjes.
Çështja lidhet me dyshime për falsifikim dokumentesh pronësore në Seman, ndërsa hetimet po zhvillohen nga Prokuroria e Fierit.
Fillimisht në disa media u raportua se u arrestua Kastriot Haskaj, pronari i linjës së kafes “Moncafe”, dhe i hotelit me të njëjtin emër në Tiranë, por në fakt në pranga ka rënë sipërmarrësi Kastriot Hasko, shkruan Voxnews.
Hasko është bërë i njohur së fundmi për një konflikt që lidhet me pronësinë e një sipërfaqeje prej rreth 37 hektarësh tokë në Palasë.
Ndërkohë, Ertis Shehu ka mbajtur më herët detyrën e drejtuesit të Agjencisë Shtetërore të Kadastrës.
Hetimet vijojnë për të zbardhur rrethanat dhe rolin e personave të përfshirë në çështjen e dokumenteve pronësore.
