Tre të rinj janë plagosur me thikë mbrëmjen e së mërkurës në Sarandë, ndërsa policia ka arrestuar dy persona dhe ka shpallur në kërkim një tjetër.
Të plagosurit janë identifikuar si vëllezërit Elidon Shukulli, 24 vjeç, dhe Mario Shukulli, 20 vjeç, si dhe 19-vjeçari Andi Saliaj. Burime spitalore bëjnë me dije se 24-vjeçari Elidon Shukulli është nisur drejt Tiranës për trajtim më të specializuar.
Ngjarja ka ndodhur rreth orës 21:55, në një subjekt tregtar në lagjen nr. 1 të Sarandës, pranë hyrjes për në shëtitoren e qytetit. Pas hetimeve për zbardhjen e rrethanave të ngjarjes, policia ka arrestuar dy persona, njëri prej të cilëve është edhe 19-vjeçari Andi Saliaj, i cili ishte mes të plagosurve.
Në pranga kanë rënë Kamelo Aliaj, 22 vjeç, dhe Andi Saliaj, 19 vjeç. Ndërkohë, 19-vjeçari Eduard Bajrami është shpallur në kërkim. Dy të arrestuarit akuzohen për “plagosje të rëndë me dashje” dhe “prishje të rendit dhe qetësisë publike”. Hetimet vijojnë për zbardhjen e plotë të shkaqeve dhe dinamikës së konfliktit.
