Lufta tregtare, BE-ja i kërkon Kinës të kufizojë eksportet e makinave hibride

Bashkimi Evropian i ka kërkuar Kinës të kufizojë eksportet e makinave hibride në përpjekje për të shmangur një luftë tregtare, raportoi këtë të enjte Financial Times.

Brukseli dëshiron që Pekini të kufizojë shitjet e automjeteve hibride kineze në rreth 15% të tregut të BE-së, tha gazeta, duke cituar njerëz të njohur me çështjen.

“Nëse ata nuk i kufizojnë eksportet e tyre në tregun tonë, atëherë ne do ta bëjmë. Kjo ka të bëjë me përpjekjen për të ndaluar deindustrializimin . Ne duhet të veprojmë. Kjo ka të bëjë me menaxhimin e tregtisë”, tha një zyrtar i BE-së, sipas FT.

Sipas raportit, BE-ja i ka kërkuar Kinës të kufizojë eksportet e produkteve të tjera, përfshirë kimikatet, ndërkohë që kërkon të rrisë tregjet për produktet evropiane të eksportit në Kinë.

Presidentja e Komisionit Evropian, Ursula von der Leyen, tha të mërkurën, se koalicioni evropian do të përdorë çdo mjet në dispozicion për të zvogëluar atë që ajo e quajti një deficit tregtar “të paqëndrueshëm” me Kinën .

Në një fjalim para Parlamentit Europian, ajo tha se deficiti tregtar i BE-së me Kinën, i cili arriti në 360.6 miliardë euro vitin e kaluar dhe u zgjerua me 9% në gjashtë muajt e parë të këtij viti , ka arritur në një pikë kthese dhe Europa tashmë po përjeton një “tronditje të dytë kineze” përmes deindustrializimit.

Komisioneri i Tregtisë i BE-së, Maros Sefcovic, i cili po udhëheq bisedimet me Kinën për të trajtuar deficitin tregtar, ka thënë se dëshiron rezultate të prekshme deri në tetor dhe pritet të vizitojë Kinën në fillim të muajit të ardhshëm.