Besëlidhja Basket vijon përgatitjet për sezonin e ri, pas performancave dhe rezultateve pozitive të arritura gjatë viteve të fundit, si në arenën kombëtare, ashtu edhe në atë rajonale.
Rritja e nivelit dhe ambiciet e klubit lezhjan kanë bërë që faza përgatitore të konceptohet me një seri ndeshjesh testuese ndaj kundërshtarëve të fortë, me synimin që skuadra të jetë në formën më të mirë për sfidat e sezonit të ri.
Një prej testeve më të rëndësishme do të jetë përballja ndërkombëtare me AlUla SC, ekipin kampion nga Arabia Saudite. Ndeshja miqësore është programuar për më 19 shtator 2026, ora 18:00, në Pejë, dhe përbën një mundësi të rëndësishme për stafin teknik për të matur nivelin e skuadrës përballë një kundërshtari të nivelit të lartë.
Për Besëlidhjen, përballje të tilla janë gjithashtu dëshmi e rritjes së klubit dhe e pozicionit që ai ka krijuar përmes rezultateve të viteve të fundit. Objektivi është që kjo ecuri të vazhdojë edhe në sezonin e ri, duke rritur më tej standardin sportiv dhe konkurrueshmërinë e skuadrës.
Rezultatet dhe progresi i Besëlidhjes janë fryt i një pune të përbashkët ndër vite, nga basketbollistët dhe stafi teknik, te drejtuesit e klubit, Bashkia Lezhë, sponsorët dhe të gjithë mbështetësit që kanë kontribuar në zhvillimin e ekipit.
Ndeshja me AlUla SC është një tjetër hap në këtë rrugëtim, ndërsa Besëlidhja kërkon të konfirmojë në sezonin e ri nivelin dhe ambiciet e saj, brenda dhe jashtë vendit.