Deputetja e pavarur Marjana Koçeku ka reaguar pas vendimit të Dhomave të Specializuara të Kosovës në Hagë ndaj ish-krerëve të Ushtrisë Çlirimtare të Kosovës, duke ngritur pikëpyetje mbi qëndrimin e institucioneve shqiptare.
Në një prononcim për News24, Koçeku tha se kishte kërkuar të merrte fjalën në Kuvend për të kërkuar përgjegjësi lidhur me mënyrën se si shteti shqiptar është angazhuar ndër vite për çështjen e Kosovës, por pretendoi se nuk iu dha mundësia të fliste.
Sipas saj, bëhet fjalë për një çështje që prek shqiptarët brenda dhe jashtë kufijve dhe për të cilën, sipas interpretimit të saj, institucionet shqiptare kanë detyrime kushtetuese.
“Kam kërkuar fjalën për të kërkuar përgjegjësi dhe përgjigje ndaj neglizhencës nga institucionet shqiptare ndër vite për çështjen e Kosovës”, u shpreh Koçeku.
Ajo kritikoi gjithashtu mënyrën se si janë përdorur marrëdhëniet ndërkombëtare të Shqipërisë, duke argumentuar se konsolidimi i vendit në arenën evropiane duhet të shërbejë edhe për çështje që lidhen me interesat kombëtare.
“Çështja e Kosovës është neglizhuar sistematikisht. Shteti shqiptar është konsoliduar në marrëdhëniet ndërkombëtare, por për çfarë po përdoren këto miqësi nëse nuk i vendosim në shërbim të interesave shtetërore këto lidhje?”, deklaroi ajo.
Në vijim, deputetja pretendoi se këto marrëdhënie janë përdorur më shumë për interesa politike sesa për atë që ajo e cilësoi si “dinjitetin e shtetit”.
“Detyrim kushtetues për shtetin tonë shqiptar është që t’u garantojë mbrojtje, liri dhe të drejta të gjithë shqiptarëve brenda dhe jashtë kufirit”, tha Koçeku.
