"Nuk kam raport me asnjë anëtar të PS-së"/ Koçeku: Kërcënimi nga Bajrat ka baza të forta

Deputetja e pavarur, Marjana Koçeku, ka dhënë një prononcim për mediat jashtë Kuvendit. Koçeku ka folur për largimin nga Grupi Parlamentar i PS-së, ku tha se nuk ka asnjë raport me asnjë deputet socialist. Ndër të tjera theksoi se do të vijojë të qëndrojë si deputete e pavarur.

“Marrëdhëniet me ndërkombëtarët shteti duhet t'i kishte përdorur për interesa shtetërore, jo për interesa politike për persona të caktuar. Vendimin për t'u larguar nga PS nuk ia kam komunikuar askujt më para se ta njoftoja.

Do të qëndroj deri në fund si deputete e pavarur. Betimin e kam bërë mbi Kushtetutë dhe jo mbi statutin e ndonjë partie. Nuk kam asnjë raport me asnjë anëtar të PS-së dhe kjo është për të respektuar pozicionin tim si deputete e pavarur e këtij Kuvendi”, tha Koçeku.

E pyetur më tej për kërcënimin nga fisi i Bajrave, Koçeku tha se kallëzimi i saj është bërë në baza të forta. Ndër të tjera shtoi se nuk ka marrë asnjë thirrje nga SPAK-u në lidhje me kallëzimin e Bajrave.

“Nuk do të doja të ndalesha më tej, mendoj se i gjithë informacioni që kam dhënë është i bazuar në baza të forta. Nuk jam komunikuar nga SPAK-u. Ajo që kam thënë ka baza të forta dhe i qëndroj asaj që kam thënë më përpara”, tha deputetja. /CNA