Huamarrja e qeverisë në tregun e brendshëm do të rritet me 34% në tremujorin e fundit

Huamarrja e qeverisë në tregun e brendshëm do të rritet ndjeshëm në tremujorin e fundit të vitit.

Sipas kalendarit të huamarrjes të Ministrisë së Financave, shuma e programuar për t’u financuar në tregun e brendshëm, (duke përfshirë edhe rifinancimet e instrumenteve të maturuar) do të ketë vlerën 87 miliardë lekëve, në rritje me 9.4% krahasuar me shumën e planifikuar të huamarrjes për tremujorin e tretë dhe me 34% krahasuar me planin e huamarrjes në të njëjtën periudhë të një viti më parë.

Shuma prej 87 miliardë lekësh është gjithashtu ndjeshëm më e lartë krahasuar me projeksionin e planit vjetor të huadhënies, që parashikonte emetime totale në vlerën e 78.5 miliardë lekëve për tre muajt e fundit të vitit.

Rritja prej 8.5 miliardë lekësh mund të shpjegohet me shuma të paplotësuara në ankandet e deritanishme të këtij viti ose me rishpërndarje të strukturës së financimit të deficitit buxhetor.

Mbështetur në të dhënat e planit vjetor të huamarrjes, vlera e instrumenteve të borxhit që maturohen në tregun e brendshëm për tremujorin e katërt është rreth 42 miliardë lekë.

Duke zbritur këtë shumë, vlera neto e huamarrjes për tremujorin e tretë vlerësohet në rreth 45 miliardë lekë, praktikisht e barabartë me të gjithë huamarrjen vjetore neto të parashikuar në planin vjetor të huamarrjes.

Huamarrja gjatë tremujorit të katërt do të jetë e dominuar nga obligacionet, si në numër ankandesh, ashtu edhe në vlerë emetimi.

Nga 22 ankande gjithsej, 15 prej tyre do të jenë ankande për emetim obligacionesh, me maturim nga dy deri në pesëmbëdhjetë vjet. Obligacionet do të përbëjnë gjithsej 60% të shumës së planifikuar të huamarrjes për tremujorin e fundit.

Rritja e maturitetit mesatar të borxhit të brendshëm është një tendencë disavjeçare, që Ministria e Financave e ka ndërmarrë me qëllim uljen e rrezikut të rifinancimit.

Në fund të qershorit, maturiteti mesatar i instrumenteve të borxhit të brendshëm u rrit më tej në 1179 ditë, nga 1002 ditë që kishte qenë në fund të vitit 2025. Maturiteti mesatar i borxhit është aktualisht në nivelet më të larta historike.

Kalendari i huamarrjes përfshin edhe ankandeve të reja të obligacioneve afatgjata, 10-vjeçare dhe 15-vjeçare, duke ofruar alternativa me kthime më të larta për investitorët e interesuar.

Ndërkohë, ankandet e bonove të thesarit, po përdoren më pak, sidomos ato me maturim më të shkurtër se një vit. Në të gjithë tremujorin e fundit janë parashikuar tre ankande të tillë, nga të cilët dy me maturim 3-mujori dhe një me maturim 6-mujor.

Katër ankandet e tjera janë ankande të bonove 12-mujore, që, për nga shuma e emetimeve, ngelen instrumenti kryesor i huamarrjes së brendshme.

Rritja e kërkesë së qeverisë për financim në tregun e brendshëm në tremujorin e fundit të vitit mund të gjenerojë presione të mëtejshme për yield-et.

Që prej tremujorit të dytë të vitit, yield-et po shënojnë rritje graduale për të gjitha instrumentet, edhe në shtysën e pritshmërive më të larta për rritjen e normave të interesit./Monitor