Vendimi i Hagës/ Kuvendi, kundër përpjekjeve serbo-ruse për të instrumentalizuar procesin

Kuvendi miraton me dakordësi deklaratën e përbashkët kundër vendimit të djeshëm të Gjykatës Speciale ndaj ish-krerëve të UÇK-së.

Në deklaratën e përbashkët, kryetari i Kuvendit, Niko Peleshi, theksoi se Kuvendi qëndron kundër çdo përpjekjeje të Serbisë dhe Rusisë për të instrumentalizuar politikisht këtë proces, për të delegjitimuar luftën çlirimtare.

Peleshi nënvizoi se ky aktgjykim nuk mund të shkruajë historinë e këtij populli apo të barazojë agresorin me viktimën.

“Ky aktgjykim nuk mund të shkruajë historinë e këtij populli apo të barazojë agresorin me viktimën. Kuvendi qëndron kundër çdo përpjekjeje të Serbisë dhe Rusisë për të instrumentalizuar politikisht këtë proces, për të delegjitimuar luftën çlirimtare. Kuvendi qëndron në solidaritet me popullin e Kosovës dhe pranë Hashim Thaçit, Kadri Veselit, Jakup Krasniqit dhe Rexhep Selimit.

E palëkundur mbetet bindja jonë në pafajësinë e tyre. UÇK luftoi për lirinë dhe çlirimin e Kosovës. Kuvendi pret që gjithë mjetet juridike të ndiqen deri në fund. Kuvendi angazhohet që në të gjitha forumet ndërkombëtare të dënojë krimet e Sllobodan Millosheviçit në Kosovë”, tha Peleshi./ CNA