Deklarata e Kuvendit për vendimin e Hagës/ Këlliçi: Manovër për t'u hedhur hi në sy shqiptarëve

Nënkryetari i PD-së, Belind Këlliçi në foltoren e Kuvendit ka folur mbi deklaratën e përbashkët për vendimin e Hagës ndaj ish-krerëve të UÇK-së.

Këlliçi tha se deklarata e përbashkët është një manovër, një akt i radhës nga mazhoranca për tu hedhur hi në sy shqiptarëve.

Më tej ai theksoi se nga Kuvendi kreu i PD-së Sali Berisha dhjetë vite më parë kishte paralajmëruar çfarë do të ndodhte në dhomat e specializuara në Hagë, ndërsa kryeministri Edi Rama udhëtonte me helikopter drejt Prishtinës për bindur lidershipin e Kosovës ta miratonte gjykatën speciale në Hagë.

“Po bëhet 6 orë që PD kërkon që për të qindtën herë me radhë që parlamenti të miratojë një rezolutë që të përmendë dhe citojë genocidin serb në Kosovë.

Manovra e sotme për deklaratën e përbashkët dhe për solemnitetin e kërkuar nga mazhoranca, për përpilimin dhe mbështetjen e kësaj deklarate është akti i radhës për tu hedhur hi në sy qytetarëve shqiptarë se asnjë nuk duhet të harrojë se dhjetë vite më parë ndërkohë që në këtë seancë kreu i PD-së Berisha paralajmëroi atë që ndodhi një ditë më parë në gjykatën speciale dhe i drejtohet mazhorancës se po i ngulnin thikën pas shpine Kosovës, Edi Rama fluturonte me helikopter drejt Prishtinës për t’i mbushur mendjen lidershipit të Kosovës për të miratuar gjykatën speciale në Hagë.

Meqë kishit merakun e solemnitetit të ditës së sotme, do të kishte qenë mirë dhe e udhës që ambasadorin e Kosovës në Tiranë sot ta kishim në Kuvend dhe t’i jepnim foltoren për të folur dhe fjalën e nderit për ditën e sotme”, tha Këlliçi./ CNA