Deputetja e Partisë Demokratike, Ina Zhupa, ka kritikuar ashpër mazhorancën gjatë fjalës së saj në Kuvend, duke akuzuar qeverinë se institucionet shtetërore po funksionojnë sipas interesave dhe vullnetit të kryeministrit Edi Rama.
Zhupa u ndal te problematikat që, sipas saj, përballen sot qytetarët shqiptarë, duke përmendur korrupsionin, vjedhjen dhe largimin e popullsisë nga vendi. Ajo deklaroi se kryeministri nuk duhet të merret me imazhin apo propagandën, por me pakënaqësinë e qytetarëve.
Sipas deputetes demokrate, premtimi për “Shqipërinë që duam” është zëvendësuar nga një realitet që, në vlerësimin e saj, favorizon oligarkët.
Zhupa ironizoi edhe përdorimin e konceptit të “pasqyrës” nga mazhoranca, duke thënë se ajo nuk krijon realitetin, por vetëm e reflekton atë.
“Pasqyra reflekton vetëm realitetin. Jemi katandisur keq dhe ju thoni hajdeni të reklamojmë propagandën”, u shpreh ajo.
Më tej, ajo iu referua protestave të opozitës, duke i cilësuar si një reagim të shqiptarëve ndaj situatës në vend dhe kërkesës për një Shqipëri më të jetueshme.
Një pjesë të fjalës së saj Zhupa ia kushtoi edhe “Albanian Files”, duke pretenduar se në dokumentet e publikuara gjenden projekte të kryeministrit Rama për të cilat qytetarët nuk kanë pasur dijeni. Ajo akuzoi gjithashtu mazhorancën se gjatë kësaj kohe janë ndryshuar të paktën gjashtë ligje.
Në përfundim, deputetja e PD-së deklaroi se Kuvendi nuk po pasqyron kërkesat e qytetarëve, por sipas saj po funksionon në përputhje me vullnetin e kryeministrit.
“Kuvendi nuk është reflektim i kërkesave të qytetarëve, por një institucion që reflekton vetëm dëshirat e Edi Ramës. Të jeni të sigurt se fundi do të jetë i dhimbshëm”, deklaroi Zhupa.
