Prokuroria e Tiranës ka kërkuar caktimin e masës së sigurimit “Arrest në burg” në mungesë për 41-vjeçarin David Isaac alias Indrit Kolleshi alias Indrit Aliu, i dyshuar për falsifikim dokumentesh dhe përdorim të dokumenteve të falsifikuara për ndryshimin e të dhënave të identitetit.
Në kuadër të të njëjtit hetim, organi i akuzës ka kërkuar edhe pezullimin nga ushtrimi i detyrës për dy punonjës të administratës publike: O.O., punonjëse e Gjendjes Civile në Njësinë Administrative nr. 3 në Tiranë, dhe A.K., specialist IT në Drejtorinë e Përgjithshme të Gjendjes Civile, në varësi të Ministrisë së Brendshme.
Sipas hetimeve të Prokurorisë, 41-vjeçari, i cili rezulton i dënuar më parë për mashtrim, dyshohet se ka përdorur dokumente të falsifikuara, të paraqitura si dokumente të lëshuara nga autoritetet e Izraelit, për të ndryshuar emrin dhe mbiemrin dhe për të siguruar më tej dokumente identifikimi.
Nga hetimi ka rezultuar se shtetasi me inicialet I.A. alias I.K. ka ndryshuar emrin dhe mbiemrin në D.I. në Zyrën e Gjendjes Civile të Njësisë Administrative Novoselë, Bashkia Vlorë.
Më 27 nëntor 2025, gjatë kontrollit të procedurës për riaplikim për pasaportë biometrike, Njësia Administrative nr. 5 në Tiranë, ku ai rezultonte banor, konstatoi ndryshimin e të dhënave dhe riktheu gjeneralitetet e mëparshme, nga D.I. në I.K.
Megjithatë, sipas Prokurorisë, më 29 dhjetor 2025, pas një kërkese për ndryshimin e vendbanimit nga Njësia Administrative nr. 3 në Tiranë, janë kryer sërish veprime për ndryshimin e emrit dhe mbiemrit. Këtë herë, ndryshimi është bërë mbi bazën e një dokumenti të paraqitur si certifikatë e Ministrisë së Brendshme të Izraelit, duke kaluar nga I.K. në D.I., të dhëna që aktualisht vijojnë të figurojnë për këtë shtetas.
Organi i akuzës dyshon se dokumenti në gjuhën hebraike i paraqitur për ndryshimin e identitetit është i falsifikuar dhe se procedurat për ndryshimin e emrit dhe mbiemrit janë kryer në kundërshtim me ligjin “Për gjendjen civile”.
Sipas Prokurorisë, punonjësja e Gjendjes Civile, O.O., dyshohet se ka pranuar dokumentacionin pa kryer verifikimet e nevojshme. Në sistemin e Gjendjes Civile ekzistonin të dhënat e mëparshme të shtetasit dhe, sipas organit të akuzës, dokumenti i paraqitur nuk duhej të ishte pranuar si i vlefshëm pa aktet dhe verifikimet përkatëse.
Ndërkohë, hetimi ka zbuluar se ndryshimi i të dhënave në sistem është kryer përmes një “user”-i që i përkiste një punonjësi i cili kishte dalë në pension prej vitesh.
Prokuroria thotë se përmes të njëjtit “user” janë kryer një numër i lartë veprimesh për ndryshimin e të dhënave në sistemin e Gjendjes Civile, përfshirë persona që kanë pasur probleme me ligjin, persona të dënuar apo të deportuar nga vende të Bashkimit Evropian.
Për këtë arsye, krahas kërkesës për “Arrest në burg” në mungesë për 41-vjeçarin, Prokuroria e Tiranës ka kërkuar edhe masën e sigurimit “Pezullimi i ushtrimit të një detyre a shërbimi publik” për O.O. dhe A.K., ndërsa hetimet vijojnë për të dokumentuar plotësisht rrethanat dhe personat e përfshirë në këtë rast.