Autoritetet greke vijojnë prej katër ditësh kërkimet për Alket Rizain, i cili nuk u rikthye në burgun e Domokosit pas përfundimit të lejes së tij.
Rizai kishte marrë leje shpërblyese më 7 shtator dhe duhej të paraqitej sërish në burg mëngjesin e 14 shtatorit. Pas mosparaqitjes, ai u shpall zyrtarisht i arratisur.
Sipas mediave greke, që prej vitit 2021, Rizai ka përfituar gjithsej 16 leje për të dalë nga burgu.
Gjatë lejes së fundit, ai dyshohet se u përfshi në një incident të armatosur jashtë një lokali plazhi në Saronida, ku dy persona mbetën të plagosur. Që prej asaj dite, autoritetet nuk kanë mundur të përcaktojnë vendndodhjen e tij.
Një grup oficerësh policie po vijon kërkimet për gjetjen e Rizait, ndërsa mendohet se mund të jetë larguar drejt Shqipërisë.
Sipas informacioneve të raportuara në Policinë Greke, gjurma e fundit e Rizait ndodhet në Greqinë e Veriut. Autoritetet dyshojnë se prej andej ai mund të ketë kaluar ilegalisht në Shqipëri, por kjo pistë ende nuk është konfirmuar.
Rizai, i njohur për lidhjen e tij me të shumëkërkuarin grek Vasilis Paleokostas, përballet tashmë edhe me një akuzë të re, ndërsa lirimi i tij nga burgu ishte pranë.
Paralelisht, policia greke po kërkon edhe një shtetas afgan, i dyshuar si personi që qëlloi dhe plagosi dy qytetarët gjatë konfliktit në Saronida. Sipas raportimeve, ai dyshohet se ka lidhje me biznesin pranë të cilit ndodhi incidenti./Versus.al
