Polonia po përgatitet për luftë me Rusinë dhe detyra më e rëndësishme tani është përgatitja e vendit për skenarë të ndryshëm, ka deklaruar kryeministri polak, Donald Tusk.
“Polonia dhe populli polak, në asnjë rrethanë, nuk mund të përballojnë të jenë naivë apo të bazohen në dëshira. Veprimet tona duhet t’i bazojmë në fakte dhe këto fakte janë të qarta”, theksoi Tusk.
“Kam frikë se gjatë dimrit do të dëshmojmë sulme gjithnjë e më të ashpra të Rusisë ndaj infrastrukturës energjetike. Mund të shpresoj vetëm që këto provokime dhe sulme të mos e tejkalojnë kufirin e Ukrainës. Por, për fat të keq, shpresa nuk është siguri. Ne këtu në Poloni po përgatitemi për skenarë të ndryshëm”, shtoi ai.
Ndërkohë, Polonia po vendos trupa në kufi, pas sulmit të 13 shtatorit. Dronët rusë goditën disa pika vetëm pak kilometra larg territorit polak, ndërsa njëri prej tyre goditi lokomotivën e një treni në linjën Kiev–Varshavë, rreth dy kilometra nga kufiri.
