Kryeministri kanadez Mark Carney ka nisur fjalimin e tij në Parlamentin Evropian, duke e mbajtur hapjen në gjuhën frënge dhe duke falë...
KOSOVA
Dënimi i ish-krerëve të UÇK, Albin Kurti takon kreun e PDK. Zbardhen detaje
PiranjatPërditësimi i fundit 17 Shtator 2026, 18:17
Kryeministri i Kosovës, Albin Kurti, ka pritur të enjten në takim kryetarin e Partisë Demokratike të Kosovës (PDK), Bedri Hamza, një ditë pas shpalljes së aktgjykimit të shkallës së parë nga Dhomat e Specializuara në Hagë ndaj katër ish-krerëve të UÇK-së.
Në takim është diskutuar për aktgjykimin ndaj Hashim Thaçit, Kadri Veselit, Rexhep Selimit dhe Jakup Krasniqit, të cilin Kurti e ka vlerësuar si të padrejtë, të rëndë dhe me pasoja të gjera.
Sipas njoftimit të Qeverisë, kryeministri Kurti ka theksuar se aktgjykimi duhet të ndryshohet pozitivisht në shkallën e Apelit.
“Duke e vlerësuar aktgjykimin të padrejtë, të rëndë dhe me pasoja të gjera, kryeministri Kurti theksoi se ai duhet ndryshuar pozitivisht në shkallën e apelit”, thuhet në njoftim.
Kurti dhe Hamza kanë ndarë mendimet dhe përshtypjet e tyre lidhur me vendimin e djeshëm, ndërsa kanë diskutuar edhe për rrugët dhe mënyrat që duhet ndjekur për të kërkuar korrigjimin e tij në procedurat e mëtejshme.
Gjatë takimit, kryeministri Kurti dhe kryetari i PDK-së, Bedri Hamza, janë zotuar për komunikim të rregullt dhe të drejtpërdrejtë për çështjet me interes publik, shtetëror dhe kombëtar.
Në njoftim, Qeveria ka theksuar se rezistenca e popullit të Kosovës dhe lufta çlirimtare ishin të drejta dhe të domosdoshme në rrugën drejt lirisë dhe pavarësisë.
“Ushtria Çlirimtare e Kosovës ishte përgjigje organizative e shqiptarëve ndaj një regjimi shtetëror shtypës sikurse ai i Jugosllavisë së Serbisë së Millosheviqit, që i ka të dokumentuara krimet: nga represioni sistematik deri te aparteidi, nga mohimi i të drejtave themelore njerëzore e qytetare deri te spastrimi etnik dhe gjenocidi”, thuhet në njoftimin e Zyrës së Kryeministrit.
