Vendimi i Dhomave të Specializuara në Hagë ndaj ish-drejtuesve të UÇK-së ka shkaktuar reagime të shumta edhe në botën e sportit.
Një prej tyre ka ardhur nga ish-futbollisti i Kombëtares shqiptare, Taulant Xhaka, i cili ka reaguar përmes rrjeteve sociale pas dënimit të Hashim Thaçit, Kadri Veselit, Rexhep Selimit dhe Jakup Krasniqit.
Xhaka ka publikuar në Instagram një poster ku shfaqen katër ish-krerët e UÇK-së, ndërsa krahas tyre janë vendosur mesazhet: “Mos e Harroni Historinë!” dhe “JO NË EMRIN TIM”.
Në poster shfaqet gjithashtu edhe mesazhi “Liria e tyre është nderi ynë”.
Më pas, Taulant Xhaka ka publikuar një tjetër imazh të Kadri Veselit, të cilit i ka kushtuar edhe mesazhin: “Gjithmonë me ju”.
Reagimi i futbollistit ka marrë vëmendje të gjerë dhe ka shkaktuar polemika, veçanërisht në mediat serbe. Disa prej tyre e kanë cilësuar publikimin e tij si “skandal”, duke i kushtuar hapësirë reagimit të Xhakës pas vendimit të Hagës.
Reagimi i tij vjen një ditë pas vendimit të shkallës së parë, ku Hashim Thaçi u dënua me 25 vite burgim, ndërsa Kadri Veseli, Rexhep Selimi dhe Jakup Krasniqi u shpallën gjithashtu fajtorë dhe u dënuan për akuza të lidhura me krime lufte.
Taulant Xhaka, me origjinë nga Kosova, ka luajtur për vite me Kombëtaren shqiptare, ndërsa vëllai i tij më i vogël, Granit Xhaka, ka zgjedhur të përfaqësojë Zvicrën në arenën ndërkombëtare.
Dy vëllezërit kanë luajtur edhe së bashku te Basel, ndërsa Taulant Xhaka vazhdon të jetë një prej figurave të njohura të futbollit shqiptar.
Reagimi i tij në rrjetet sociale është bërë pjesë e debatit publik që ka pasuar vendimin e Dhomave të Specializuara në Hagë ndaj ish-krerëve të UÇK-së.