Protesta qytetare kundër qeverisë vijon në Tiranë, duke shënuar ditën e 110-të të tubimeve të organizuara nga qytetarët dhe grupimet protestuese.
Pjesëmarrësit u mblodhën fillimisht në sheshin “Skënderbej”, prej nga nisën marshimin në drejtim të Kryeministrisë. Në përfundim të marshimit priten fjalime nga organizatorët dhe qytetarët që i janë bashkuar protestës.
Ndër kërkesat e artikuluara gjatë tubimit është dorëheqja e kryeministrit Edi Rama, ndërsa protestuesit kanë kundërshtuar edhe ligjin për zonat e mbrojtura.
Protesta është shoqëruar me thirrje kundër drejtuesve politikë të vendit. Një prej sloganeve kryesore të dëgjuara nga turma ka qenë “Rama në burg, Berisha në burg”, duke përcjellë mesazhin e protestuesve për ndryshime në klasën politike.
Gjatë marshimit janë dëgjuar edhe thirrje si “Edi Rama jep dorëheqjen”, “Pa rini nuk ka Shqipëri” dhe “Shqipëria kërkon revolucion”.
Protestuesit kanë mbajtur pankarta dhe kanë vijuar marshimin drejt Kryeministrisë, ku pritet të zhvillohet pjesa tjetër e tubimit.
