Një grup i strukturuar kriminal që operonte online duke shpërndarë materiale të abuzimit seksual ndaj fëmijëve është goditur falë një operacioni ndërkombëtar nga Drejtoria e Antimafias në Romë. Ai u finalizua me ekzekutimin e 17 urdhër-arresteve, 10 prej tyre në flagrancë në Itali dhe një tjetër në Zvicër. Aksioni u shtri në disa rajone italiane, si Lombardia, Veneto, Puglia dhe Campania, ndërsa hetimet për lidhjet e tjera të grupit vazhdojnë.
Sipas Policisë së Shtetit, komuniteti kriminal funksiononte me rregulla shumë strikte dhe me një hierarki të qartë. Administratorët komunikonin përmes kanaleve ekskluzive, njëri prej të cilëve quhej "Salla e Mbretërve", emër që tregonte statusin që i jepnin vetes drejtuesit.
Aksesi për anëtarët e rinj bëhej vetëm pasi paguanin shuma të vogla në kriptomonedhë, të paraqitura si donacione, ose duke sjellë materiale të reja. Në total rrjeti numëronte mbi 1.009 pjesëmarrës.
Gjatë kontrolleve, autoritetet sekuestruan një sasi të jashtëzakonshme provash dixhitale, më shumë se 22.000 video, 34.000 foto dhe rreth 282.9 GB të dhëna. Materiali dyshohet se shpërndahej përmes lidhjeve private të dedikuara për të rekrutuar përdorues të tjerë, duke krijuar një sistem të mbyllur që e bënte të vështirë gjurmimin nga forcat e rendit.
Zbulimi i këtij aktiviteti ishte rezultat i një pune të gjatë në fshehtësi. Gjithçka nisi në vitin 2024, pas një informacioni të ardhur nga agjencia amerikane HSI (Homeland Security Investigations), e cila kishte identifikuar në Telegram një grup privat me emrin 'New Saga'. Për mbi një vit, një oficer i specializuar i Policisë Postare infiltroi rrjetin, duke dokumentuar nga brenda mënyrën e organizimit, rregullat e anëtarësimit dhe rolet e pjesëmarrësve.
"Operacioni na lejoi të konstatojmë krijimin e një komuniteti online privat, të strukturuar dhe të organizuar, me rregulla të rrepta", thuhet në deklaratën zyrtare të Policisë. Autoritetet italiane theksojnë se hetimi ka qenë vendimtar për të çmontuar një nga rrjetet më të sofistikuara të këtij lloji që vepronte online vitet e fundit.
Sondazh
Lexo gjithashtu
