Detaje tronditëse nga vdekja e Giorgos Mazonakis, mjekët përdorën Inteligjencën Artificiale për të shpëtuar këngëtarin grek

Detaje të reja po dalin në dritë lidhur me rrethanat e vdekjes së këngëtarit grek Giorgos Mazonakis në klinikën e mjekëve të arrestuar, Ilias Theodoropoulos dhe Ioanna Gaka.

Sipas të dhënave të ekspertizës digjitale të publikuara nga Protothema, hetuesit kanë zbuluar se gjatë momenteve kritike të përkeqësimit të gjendjes së këngëtarit, nga kompjuteri i klinikës është përdorur një modul i Inteligjencës Artificiale për të kërkuar udhëzime mbi mënyrën e shpëtimit të një pacienti.

Në telefonin e njërës prej mjekeve është gjetur gjithashtu një fotografi e fshirë, ku Mazonakis shihet i shtrirë gjatë një procedure plazmafereze. Hetuesit po verifikojnë nëse fotografia është shkrepur në ditën kur ndodhi ngjarja fatale.

Një tjetër element që po shqyrtohet është kalendari elektronik i klinikës. Sipas hetimeve, janë fshirë vetëm regjistrimet që lidhen me takimet e Mazonakis, ndërsa takimet e pacientëve të tjerë kanë mbetur të paprekura.

Kamerat e sigurisë kanë nxjerrë gjithashtu mospërputhje lidhur me orarin. Pamjet tregojnë se këngëtari ka hyrë në klinikë pak pas orës 13:00, ndërsa mjekët fillimisht kishin deklaruar se ai kishte mbërritur pas orës 16:00.

Për të rindërtuar me saktësi kronologjinë e ngjarjes, autoritetet kanë sekuestruar sistemin elektronik të makinës së plazmaferezës, kompjuterët, disqet e jashtme, dokumentet e klinikës, si dhe telefonat e mjekëve dhe sekretares.

Shkaku i saktë i vdekjes ende nuk është përcaktuar përfundimisht. Përgjigjet pritet të dalin pas përfundimit të analizave toksikologjike dhe histologjike.