“Agro Invest Korça” pjesë e “Serenights Festival”/ Spiro Fuqi për CNA: Vijojmë traditën e kulinarisë korçare

Përveç muzikës dhe serenatave, nata e parë e “Serenights Festival” ka sjellë edhe prezantimin e sipërmarrjeve që përfaqësojnë Korçën dhe traditën e saj.

Pjesë e këtij aktiviteti ka qenë edhe kompania “Agro Invest Korça”, e cila prej 32 vitesh operon në tregun shqiptar dhe atë të huaj, në fushën e përpunimit të peshkut, mishit dhe frutave-perimeve.

Themeluesi i kompanisë, Spiro Fuqi, shprehet se pjesëmarrja në këtë festival është një privilegj, ndërsa thekson se përmes produkteve të saj synon të promovojë emrin dhe traditën kulinare të Korçës.

 “Në radhë të parë ju falënderoj. Është kënaqësi për neve dhe privilegj që përfaqësojmë këtë event sot, aq të bukur, aq të kërkuar nga publiku. Ne jemi Agro Invest Korça, një kompani prodhuese e cila trajton përpunimin e peshkut, të mishit dhe të frutave-perimeve. Kompania ka 32 vite që operon në tregun shqiptar dhe atë të huaj, dhe vetë unë kam 32 vite kimist në profesion. Ajo që morëm përsipër është që në emër të Korçës ka qëllim edhe vendosjen e emrit të kompanisë Agro Invest Korça se kur flitet për ushqimin social, edhe brenda vendit, por edhe jashtë vendit, Korça zë vendin kryesor në drejtim të ushqimit social”,-tha Fuqi.

Përfaqësuesit e kompanisë bëjnë me dije se produktet e prezantuara mbështeten te tradita e vjetër e Korçës dhe Pogradecit, ndërsa synimi është ruajtja e shijeve karakteristike përmes një procesi të veçantë përpunimi. Sipas themeluesit Spiro Fuqi, prodhimet janë pa konservantë të shtuar, ndërsa kompania po përgatit edhe një linjë të re, të cilën e ka emërtuar “Kuzhina pa sobë”. Kjo nismë synon t’u ofrojë familjeve ushqime të gatshme, duke përfshirë gatime tradicionale dhe supa të ndryshme.

“Paketat janë unike, është një prodhim elitar që rrjedh duke marrë traditën e vjetër të Korçës dhe të Pogradecit. Prodhimet janë organike, pa asnjë lloj konservanti. Vetë unë kam realizuar konservantin biologjik. Dhe së afërmi, në tregun shqiptar ne do të nxjerrim ‘Kuzhinën pa sobë’, që amvisat ose familjet e veçanta të mos kenë nevojë të gatuajnë, por kompania po merr përsipër të gatuajë edhe ushqime të tjera si fasule, pastërma, fasule gjellë, supa të ndryshme”,-theksoi ai.

Një tjetër risi që kompania po zhvillon është edhe prodhimi i ushqimeve energjike, të cilat, sipas themeluesit, janë konceptuar për femra dhe meshkuj. Spiro Fuqi tregon se projekti është pjesë e ambicies së tij për të zgjeruar më tej aktivitetin e kompanisë dhe për të sjellë produkte të reja në treg, duke e lidhur këtë zhvillim me promovimin e emrit të Korçës.

“Tani kemi realizuar atë që është më e veçanta, është se janë realizuar edhe energjikët për femrat dhe për meshkujt, me 2700 kalori në 930 gramë. Është një realizim perfekt, është prodhim organik, pa asnjë lloj efekti anësor, i cili ka dhënë rezultatet e veta. Projekti vazhdon, ambicia ime personale është me faza. Themi që të bëjmë më të mirën dhe pse jo për Korçën! Gjithçka bëhet për Korçën”,-u shpreh Fuqi.

Pjesëmarrja e “Agro Invest Korça” në natën e parë të “Serenights Festival” i është bashkuar atmosferës së krijuar nga artistët dhe publiku, duke sjellë në vëmendje edhe sipërmarrjet që promovojnë produktet dhe traditën e qytetit. Festivali do të vijojë për tri net të tjera, në hapësira të ndryshme të Korçës, me synimin për të bashkuar muzikën, kulturën dhe vlerat që e bëjnë qytetin të veçantë./CNA