Pak orë pas miratimit në Kuvend, Presidenti i Republikës, Bajram Begaj, ka dekretuar ligjin për pagat e magjistratëve.
Bëhet fjalë për ligjin nr. 95/2026, që ndryshon ligjin për statusin e gjyqtarëve dhe prokurorëve në Republikën e Shqipërisë.
Pagat e magjistratëve janë bllokuar që prej 1 gushtit 2026, pas vendimit të Gjykatës Kushtetuese që shfuqizoi dispozitat për pagat e tyre.
Sipas argumentimit të Kuvendit, pa hyrjen në fuqi të ligjit të ri, Thesari i Shtetit nuk mund të ekzekutojë pagesat për gjyqtarët dhe prokurorët.
Synimi është që pagesat e prapambetura, që nga 1 gushti, si edhe pagat në vijim, të mund të nisin të ekzekutohen që prej 18 shtatorit.
Nëse ligji do të ndiqte procedurën e zakonshme të hyrjes në fuqi, procesi do të vonohej me rreth 15 deri në 35 ditë, sipas argumentimit të Kuvendit.
Për këtë arsye, thotë Presidenca, Begaj ka dhënë pëlqimin për hyrjen e menjëhershme në fuqi të ligjit.
Njoftimi i Presidencës:
Presidenti i Republikës nxorri sot dekretin për shpalljen e ligjit nr. 95/2026, “Për disa shtesa dhe ndryshime në ligjin nr. 96/2016, “Për statusin e gjyqtarëve dhe prokurorëve në Republikën e Shqipërisë”, i ndryshuar”, pasi kishte dhënë më parë pëlqimin për hyrjen në fuqi të tij menjëherë.
Presidenti i Republikës dha pëlqimin për hyrjen në fuqi të ligjit menjëherë bazuar në kërkesën e Kuvendit, i cili argumentonte nevojën dhe urgjencën për hyrjen në fuqi menjëherë me faktin se shfuqizimi i dispozitave për pagat e magjistratëve nga vendimi i Gjykatës Kushtetuese kishte bllokuar dhënien e pagave për të gjithë gjyqtarët dhe prokurorët, që nga data 1 gusht 2026 e në vazhdim.
Pa hyrjen në fuqi të ligjit të ri, Thesari i Shtetit nuk mund të çlirojë pagesat për magjistratët.
Qëllimi i Kuvendit ishte që të mundësonte pagesat e Thesarit të Shtetit për gjyqtarët dhe prokurorët që në datën 18 shtator 2026 për pagat e bllokuara që nga data 1 gusht 2026 dhe për ato vijuese. Hyrja në fuqi e ligjit sipas procedurave të zakonshme do ta vononte këtë proces nga 15 deri në 35 ditë. Dhënia e pëlqimit nga Presidenti i Republikës për hyrjen e ligjit në fuqi menjëherë është prerogativë dhe instrument kushtetues, i cili justifikohet nga nevoja dhe urgjenca e rrethanave të rastit.
Argumentet dhe kundërargumentet kushtetuese lidhur me masën e pagës mund të debatohen edhe në instanca të tjera kompetente, por zhbllokimi në rrugë të ligjshme i vetë pagës mund të bëhet vetëm duke futur në fuqi ligjin e ri.
Hyrja e ligjit në fuqi menjëherë kërkon që Presidenti i Republikës të veprojë menjëherë.
