Deputeti demokrat, Belind Këlliçi komentoi miratimin e ligjit për pagat e magjistratët si dhe çështjen e Belinda Ballukut, ish zëvendës kryeministres dhe ish ministres nën akuzë nga Prokuroria e Posaçme.
I ftuar në emisionin “Minuta e Parë” në News24, Këlliçi tha se opozita kërkoi që në ligjin për pagat e magjistratëve të zbatoheshin vendimet e Gjykatës Kushtetuese, por maxhoranca nuk e reflektoi këtë kërkesë.
Ai u ndal edhe te numri i votave të mazhorancës, që janë ulur. Këlliçi përmendi edhe votën e Tom Doshit, ndërsa tha se mungesa e Belinda Ballukut në seanca e ka reduktuar numrin e votave të disponueshme nga mazhoranca.
“PS-ja ka 83 vota në Kuvend, por me largimin e Koçekut kanë ngelur 82. Por ka votat e Tom Doshit. Ndërkohë Balluku nuk vjen më në seancë dhe ai ka një votë më pak. Ai zgjodhi ditën e djeshme që të votonte”, u shpreh ai.
Ai u shpreh se SPAK do t’i drejtohet sërish Kuvendit për t’i hequr imunitetin Ballukut, ndërsa shtoi se kryeministri ka dhënë sinjale se do ta lëshojë.
“Duke parë sulmet e paprecedenta ndaj Ballukut tani, kuptohet se është vendimmarrje e Ramës për ta hedhur Belinën tani, si limon të shtrydhur. Pushteti lokal dhe ai vendor janë të ndarë kryesisht”, deklaroi Këlliçi.
Deputeti tha se fati politik i Ballukut tashmë është i mbyllur.
“Fati politik i Ballukut është i mbyllur. Ai kapitull është i mbyllur. Edhe pse është goditje e madhe për Ramën. Të gjithë e dimë se aferat që ka bërë Balluku, i ka bërë me Ramën”, tha ai.
