Ministri për Evropën dhe Punët e Jashtme, Ferit Hoxha, priti në Tiranë përfaqësuesin e ri të Organizatës Botërore të Shëndetësisë (OBSH) në Shqipëri, Dr. Fabio Scano.
Gjatë takimit u diskutua mbi bashkëpunimin mes Shqipërisë dhe OBSH-së, me fokus avancimin e politikave kombëtare në fushën e shëndetësisë dhe forcimin e mëtejshëm të sistemit të kujdesit shëndetësor në vend.
Sipas ministrit Hoxha, ky partneritet është i lidhur ngushtë me prioritetet e agjendës kombëtare të zhvillimit dhe përbën një element të rëndësishëm për përmirësimin e shërbimeve shëndetësore ndaj qytetarëve.
Në takim u vlerësua gjithashtu rëndësia e bashkëpunimit me OBSH-në në avancimin e reformave që lidhen me procesin e integrimit evropian të Shqipërisë dhe negociatat për anëtarësimin në Bashkimin Evropian.
“Ne presim me padurim thellimin e mëtejshëm të partneritetit tonë, duke përfshirë edhe përmes bashkëpunimit të zgjeruar rajonal, inovacionit dhe transformimit digjital të shërbimeve të kujdesit shëndetësor, në dobi të qytetarëve dhe komuniteteve tona”, deklaroi ministri Hoxha.
Bashkëpunimi me OBSH-në pritet të vijojë të përqendrohet në zhvillimin e politikave shëndetësore, modernizimin e shërbimeve dhe mbështetjen e reformave në sektorin e kujdesit shëndetësor.