Luis Nazario de Lima, i njohur në mbarë botën thjesht si Ronaldo, feston sot 50-vjetorin e lindjes. Braziliani mbetet një prej sulmuesve më të jashtëzakonshëm që ka njohur futbolli, me një karrierë të shndritur, por edhe të shënjuar nga dëmtime të rënda që disa herë rrezikuan t’i japin fund gjithçkaje.

I lindur më 18 shtator 1976 në Brazil, Ronaldo tërhoqi vëmendjen që në fillimet e tij me Cruzeiron. Hapi i madh drejt Europës erdhi me transferimin tek PSV Eindhoven, ndërsa më pas kaloi te Barcelona.

Në vitin 1997 veshi fanellën e Interit dhe që në sezonin e parë fitoi Kupën UEFA. Ronaldo shënoi edhe në finalen ndaj Lazios, duke konfirmuar statusin e tij si një prej yjeve më të mëdhenj të futbollit europian. Megjithatë, periudha në Milano u ndërpre nga dëmtimet e rënda në gju, të cilat e lanë gjatë jashtë fushave.

Momenti i madh i rilindjes erdhi në Botërorin e vitit 2002. Pas zhgënjimit të përjetuar me Interin më 5 maj të po atij viti, Ronaldo udhëhoqi Brazilin drejt titullit botëror në Kore dhe Japoni. Ai shënoi 8 gola, përfshirë dy golat e finales së fituar 2-0 ndaj Gjermanisë.

Pas triumfit botëror, “Fenomeni” u transferua te Real Madridi, ku realizoi 104 gola në 177 ndeshje. Në vitin 2007 u rikthye në Milano, këtë herë për të luajtur me Milanin, ndërsa aventurën e tij të fundit e zhvilloi te Corinthians.

Ronaldo u tërhoq nga futbolli në vitin 2011, duke lënë pas një trashëgimi të jashtëzakonshme. Ai fitoi dy Topa të Artë, në vitet 1997 dhe 2002, ndërsa me Brazilin shënoi 15 gola në Kupën e Botës. Në vitin 1994 ishte gjithashtu pjesë e Brazilit kampion bote, edhe pse nuk zbriti në fushë.

Një karrierë e jashtëzakonshme, në të cilën talenti, golat dhe trofetë u përballën vazhdimisht me dëmtimet, por që nuk e penguan Ronaldo Nazarion të mbetet përgjithmonë një “Fenomen” i futbollit.