Deputeti i Partisë Socialiste për Durrësin, shkrimtari dhe eseisti Loer Kume, ka njoftuar me dhimbje ndarjen nga jeta të bashkëshortes së tij, Lorinës.
Përmes një mesazhi të ndjerë, Kume ka ndarë lajmin me familjarët, miqtë dhe të gjithë ata që e kanë njohur bashkëshorten e tij, të cilën e përshkruan si dashurinë e jetës, shoqen dhe nënën e dy fëmijëve të tyre.
Kume tregon se ai dhe Lorina ishin njohur që në moshën 18-vjeçare dhe se së bashku kishin ndarë më shumë se dy dekada jetë. Sipas tij, bashkëshortja e tij prej kohësh përballej me një sëmundje, ndërsa gjatë kësaj beteje kishte treguar forcë të jashtëzakonshme.
Lajmin për ndarjen e saj nga jeta, deputeti e ka shoqëruar me një mesazh të gjatë, ku përshkruan lidhjen e tyre dhe dhimbjen e familjes për humbjen.
MESAZHI I LOER KUMES:
“Lorina, Lori, Lorushi, dashuria ime që 18 vjeç, më shumë se gjysma ime, shpirti im binjak, shtëpia ime, gruaja, e dashura, shoqja, mësuesja ime, nxënësja ime, busulla ime, mishi im, zëri e fjala e syri im, gjithçkaja e madhe, nëna e fëmijëve tanë, dy mrekullive, sot na la vetëm.
Ne të tre, familja, njerëzit që e njohën, e prekën, e dëgjuan, u mbështollën nga energjia dhe aura e Lorit, Lorushit, e donim këtu të na donte pa limite e të na ndriçonte siç e ka bërë gjithë jetën e saj.
Dhe në luftë e tregoi veten njeriun më të fortë që kemi njohur e dëgjuar. Sot kemi trashëgiminë e Lorit pas.”
Sipas njoftimit të familjes, ceremonia e varrimit do të zhvillohet ditën e shtunë, më 19 shtator 2026.
Pritjet për ngushëllime do të zhvillohen të dielën, të martën dhe të mërkurën, nga ora 09:00 deri në 13:00 dhe nga ora 16:00 deri në 21:00, pranë Agjencisë Leba, në lagjen nr. 6, Rruga Andon Naçi, në Durrës.