Tre të rinjtë shqiptarë që shihni në foto janë viktimat e aksidentit tragjik të ndodhur në Glyfada të Athinës, ku humbën jetën tre nga pesë personat që udhëtonin në të njëjtin automjet.
Aksidenti ndodhi rreth orës 02:00 në bulevardin Poseidonos, pranë kryqëzimit me rrugën Kalypsous, në drejtim të Athinës. Automjeti doli nga rruga dhe u përplas me forcë me një mur betoni pranë një hoteli.
Për nxjerrjen e personave të bllokuar në makinë u angazhuan forcat zjarrfikëse, por tre prej të rinjve nuk mundën t’u mbijetonin plagëve të marra. Sipas autoriteteve greke, dy prej viktimave ishin 23 dhe 26 vjeç, ndërsa identiteti i viktimës së tretë nuk ishte bërë publik në raportimet e para.
Dy 18-vjeçarët e tjerë që ndodheshin në automjet u dërguan me urgjencë në spital. Njëri prej tyre raportohet në gjendje kritike dhe është intubuar, ndërsa tjetri ka pësuar dëmtime të shumta.
Policia greke vijon hetimet për zbardhjen e rrethanave të aksidentit. Mes pistave që po shqyrtohen është edhe mundësia që makina të ketë qenë e përfshirë në një garë shpejtësie me një automjet tjetër, ndërsa po verifikohet edhe nëse të rinjtë po regjistronin një video për TikTok para përplasjes.
Këto pista mbeten ende të pakonfirmuara zyrtarisht.
