Pas vitesh ankesash për çmimet që kanë rënduar gjithnjë e më shumë xhepat e shqiptarëve, duket se edhe kryeministri Edi Rama më në fund po kthen sytë nga supermarketet.
Çmimet e produkteve të përditshme janë kthyer në një barrë të vështirë për shumë familje, ndërsa Rama këtë herë ka zgjedhur t’u drejtohet drejtpërdrejt rrjeteve të supermarketeve, duke i paralajmëruar se nuk do të tolerojë që barra t’i faturohet konsumatorit.
Në takimin me përfaqësuesit e supermarketeve dhe furnitorëve kryesorë, Rama kërkoi pjesëmarrjen e bizneseve në fazën pilot të “Pasqyrës së Çmimeve”, platforma që synon të bëjë publike çmimet e produkteve në pika të ndryshme shitjeje dhe t’u mundësojë qytetarëve krahasimin mes tyre.
Por përtej kërkesës për transparencë, kryeministri përdori një gjuhë të ashpër ndaj bizneseve, duke e lidhur rritjen e çmimeve me marzhe që i konsideroi të pajustifikuara.
KËRCËNIMI I RAMËS NDAJ SUPERMARKETEVE
Rama u kërkoi rrjeteve të shitjes me pakicë të japin të dhëna të plota për produktet, përfshirë barkodin, markën, gramaturën, njësinë matëse dhe çmimin final me TVSH.
Sipas tij, qytetarët duhet të kenë mundësi të shohin se ku një produkt shitet më lirë dhe të dallojnë çmimin normal nga ai promocional.
Por ajo që tërhoqi më shumë vëmendjen ishte paralajmërimi i drejtpërdrejtë ndaj bizneseve.
“Por që të ngarkoni njerëzit, këtë ne nuk do t’ua lejojmë, këtë unë jua siguroj, do jetë një problem i madh. Do thoni ‘çfarë i hapëm vetes, në djall ato që po i fitojmë pa të drejtë’”, deklaroi Rama.
Rama tha se nuk po u kërkon kompanive të heqin dorë nga fitimet dhe as nuk synon të përcaktojë çmimet, por kundërshtoi atë që e cilësoi si “marzhe të papranueshme fitimi”.
“Askush nuk ju kërkon që ju të ndaloni së fituari… por që të ngarkoni njerëzit, këtë ne nuk do ta lejojmë”, u shpreh ai.
QYTETARËT SHPËRTHYJNË NË KOMENTE
Ndërsa Rama u kërkon supermarketëve të reflektojnë mbi çmimet, reagimi i qytetarëve në postimin e kryeministrit është përqendruar te vetë problematika që ata thonë se përballen çdo ditë në pazar.
“Çmime të larta të papërballueshme për konsumatorin”, shkruan qytetari.
Një tjetër komentues, ngre pretendimin për diferenca mes çmimeve të ekspozuara dhe atyre që aplikohen në arkë:“Supermarketet punojnë me dy çmime. Një çmim është në arkë dhe çmim tjetër është nëpër rafte. Këto kontrolloni.”
Në komentet e tjera qytetarët kërkojnë kontrolle edhe për cilësinë dhe afatet e produkteve, ndërsa një pjesë ankohen për çmimin e karburanteve.
“Ulni naftën se ka shkuar në tavan”, shkruan një tjetër komentues.
Një tjetër qytetar ngre shqetësimin për produktet ushqimore dhe kontrollin e afateve të skadencës.
Pra, në vend që diskutimi të mbetet vetëm te një platformë online, komentuesit i kanë kërkuar qeverisë kontrolle konkrete në terren për çmimet, produktet dhe mënyrën e faturimit.
TABAKU: SHQIPTARËT I DINË CMIMET NË XHEPAT E TYRE
Në anën tjetër, deputetja e Partisë Demokratike, Jorida Tabaku, ka reaguar ndaj deklaratave të Ramës, duke e cilësuar platformën e re si të pamjaftueshme për të shpjeguar problemin e çmimeve.
Tabaku shkruan se shqiptarët nuk kanë nevojë për një faqe interneti për të kuptuar se çmimet janë rritur, pasi sipas saj këtë e përjetojnë çdo ditë në xhepat e tyre.
Ajo argumenton se qytetarët tashmë i krahasojnë çmimet me vendet e rajonit dhe përmend rastet kur, sipas saj, shqiptarët blejnë karburant në Maqedoninë e Veriut dhe Kosovë, ndërsa për ushqimet udhëtojnë edhe drejt Greqisë.
Sipas Tabakut, ndryshimi kryesor mes Shqipërisë dhe vendeve të rajonit nuk është mungesa e informacionit për çmimet, por ajo që ajo e identifikon si “korrupsion”.
“Qytetarët shqiptarë e dinë që çmimet i kanë të rritura, e dinë në xhepat e tyre sa herë bëjnë pazare”, shkruan Tabaku, duke shtuar se shqiptarët nuk kanë nevojë për një faqe interneti për të parë sa kushton nafta apo ushqimet.
