Një ndërhyrje jashtëzakonisht komplekse kirurgjikale është përmbyllur me sukses në një spital pediatrik në St. Louis të Shteteve të Bashkuara, ku mjekët kanë arritur të ndajnë dy binjake dyvjeçare, të cilat kishin lindur të bashkuara në pjesën e kafkës.
Vajzat, Hiyab dhe Wuhbto, kishin lindur në Etiopi dhe ishin të bashkuara në kokë, një gjendje tepër e rrallë që kërkon ndërhyrje të ndërlikuara dhe një planifikim të gjatë mjekësor.
Operacioni zgjati më shumë se 24 orë dhe në të morën pjesë mbi 60 profesionistë të fushave të ndryshme. Ekipi përfshinte neurokirurgë pediatrikë, kirurgë plastikë dhe specialistë të kujdesit intensiv, të cilët punuan së bashku gjatë gjithë procedurës.
Ndarja e binjakeve konsiderohet një prej ndërhyrjeve më të rralla dhe më të vështira në kirurgjinë pediatrike, për shkak të kompleksitetit të strukturave të kafkës dhe trurit që mund të jenë të përbashkëta.
Pas përfundimit të operacionit, të dyja vajzat kanë vijuar trajtimin dhe rehabilitimin intensiv. Wuhbto i është nënshtruar tashmë me sukses një tjetër ndërhyrjeje për rindërtimin e kafkës, ndërsa Hiyab pritet t’i nënshtrohet së njëjtës procedurë më vonë gjatë vjeshtës.
Binjaket kishin mbërritur në Shtetet e Bashkuara nga Etiopia në vitin 2025, pak para se të mbushnin një vjeç. Që prej mbërritjes së tyre, ekipi mjekësor kishte punuar për përgatitjen e ndërhyrjes dhe planin e trajtimit pas ndarjes.
Sipas spitalit, binjaket e bashkuara në kokë janë një fenomen jashtëzakonisht i rrallë, që ndodh afërsisht një herë në 2.5 milionë lindje.
Pas ndërhyrjes historike, fokusi i ekipit mjekësor është tashmë te rikuperimi dhe rehabilitimi i dy vajzave, të cilat do të vijojnë të monitorohen nga specialistët gjatë procesit të tyre të gjatë të shërimit.