Alket Rizai, i cili prej 14 shtatorit rezulton i arratisur nga një burg në Greqi, është përmendur edhe në hetimet për një vrasje të ndodhur disa muaj më parë në burgun e Domokosit. Sipas televizionit grek SKAI, 47-vjeçari është filmuar nga kamerat e sigurisë në ambientet e burgut në ditën kur i burgosuri Antonis Papadatos u vra me tre plumba në kokë.
Ngjarja ka ndodhur më 15 shkurt 2026. Për vrasjen akuzohet një i burgosur bullgar, i dënuar me burgim të përjetshëm, ndërsa në paraburgim ndodhet edhe shefi i sigurisë së burgut, i cili ishte i pranishëm në momentin e ngjarjes dhe dyshohet se ka dhënë dëshmi kontradiktore.
Pamjet e kamerave, sipas SKAI-t, tregojnë se i burgosuri bullgar e nxori Papadatosin nga sektori ku mbahej dhe e shoqëroi drejt zyrës së shefit të sigurisë. Në të njëjtën kohë, në drejtim të këtij ambienti u nis edhe Rizai, i shoqëruar nga disa të burgosur të tjerë. Në pamje, shefi i sigurisë shihet duke përqafuar Rizain, përpara se viktima të dërgohej në një dhomë ku nuk kishte kamera sigurie.
Pikërisht në atë ambient, Papadatos u qëllua tre herë: një plumb e goditi në pjesën e pasme të kokës dhe dy të tjerë në fytyrë.
I burgosuri bullgar ka marrë përsipër përgjegjësinë për vrasjen. Ai ka pretenduar se Papadatos kishte tentuar të vriste shefin e sigurisë dhe se arma ishte shkrepur gjatë përpjekjes për ta çarmatosur. Megjithatë, sipas SKAI-t, policia dhe gjyqtari hetues dyshojnë se vrasja mund të ketë qenë e porositur.
Rizai, nga ana e tij, mohon të ketë qenë në dhomën ku ndodhi krimi. Megjithatë, një punonjës i burgut ka dëshmuar se e ka parë atë duke dalë nga ambienti menjëherë pas të shtënave.
“Dëgjova të shtëna që vinin nga ambienti i zyrës së vjetër të shefit të sigurisë. Pashë që i pari doli Alket Rizai”, ka deklaruar punonjësi, sipas mediave greke.
Në kuadër të hetimeve, ekspertët e kriminalistikës kanë gjetur gjurmë gjaku në këpucët e Rizait, si dhe gjurmë baruti në rrobat e tij, raporton SKAI.
Pavarësisht këtyre të dhënave dhe dëshmisë së punonjësit, Rizai nuk është akuzuar për vrasjen. Në këtë çështje, ai ka statusin e dëshmitarit.
“Unë jam i pastër dhe nuk kam frikë nga asgjë. Nuk isha brenda zyrës së vjetër të shefit të sigurisë në momentin kur u krye krimi. Nuk kisha asnjë arsye të përzihesha në një çështje të tillë, as për gjithë paratë e botës”, ka deklaruar Rizai.
Arratisja pas përplasjes me armë
Emri i Rizait është rikthyer në vëmendje të autoriteteve greke pas arratisjes së tij nga burgu më 14 shtator. Sipas informacioneve të policisë greke, vendndodhja e tij e fundit është lokalizuar në Greqinë Veriore dhe autoritetet dyshojnë se ai mund të ketë kaluar ilegalisht kufirin drejt Shqipërisë. Kjo pistë, megjithatë, nuk është konfirmuar.
Rizai ishte liruar nga burgu i Domokosit më 7 shtator, pasi kishte përfituar një leje shtatëditore. Kjo ishte hera e 16-të që merrte një leje gjatë pesë viteve të fundit dhe, në të gjitha rastet e mëparshme, ishte kthyer në burg.
Këtë herë, gjatë periudhës së lejes, ai dyshohet se u përfshi në një përplasje me armë në një lokal plazhi në Anavyssos.
Ngjarja ndodhi në orët e para të 13 shtatorit. Sipas mediave greke, Rizai ishte në lokal me dy persona të tjerë. Rreth orës 05:00, ata dolën në parking dhe vendosën muzikë me volum të lartë në makinë. Pas kërkesës së pronarit të lokalit për të ulur zërin, mes palëve nisi një debat që më pas degjeneroi në përleshje.
Rizai dyshohet se nxori armën dhe qëlloi në ajër, ndërsa një shtetas afgan, i cili dyshohet se punonte si roje sigurie, hapi zjarr në drejtim të tij. Nga të shtënat u plagosën dy punonjës të lokalit, një 20-vjeçar grek dhe një 41-vjeçar pakistanez.
Pas incidentit, Rizai u largua me makinë së bashku me dy personat që ndodheshin me të. Të hënën, më 14 shtator, ai nuk u paraqit në burg pas përfundimit të lejes dhe u shpall zyrtarisht i arratisur.