Të dielën, më 20 shtator, qytetarët në Berlin dhe në Mecklenburg-Pomeraninë Perëndimore do t’u drejtohen kutive ...
KOSOVA
Dënimi i ish-krerëve të UÇK-së/ A rrezikon destabilizim Kosova? Eksperti: Serbia goditi më shumë SHBA-të! Ndërhyri te vendimi i Hagës
PiranjatPërditësimi i fundit 19 Shtator 2026, 11:17
Vendimi i Dhomave të Specializuara në Hagë ndaj ish-krerëve të UÇK-së pritet të ketë pasoja edhe përtej procesit gjyqësor, ndërsa në Kosovë vijojnë reagimet dhe debatet për ndikimin që mund të ketë ky akt në shoqëri dhe në zhvillimet politike. Në emisionin “News24 Fundjavë” me Megi Latifin, eksperti i sigurisë në Kosovë, Bedri Elezi, tha se vendimi ka goditur rëndë besimin e një pjese të shoqërisë kosovare te drejtësia ndërkombëtare.
Dhomat e Specializuara i shpallën fajtorë Hashim Thaçin, Kadri Veselin, Rexhep Selimin dhe Jakup Krasniqin për krimet e luftës të ndalimit/arrestimit të paligjshëm ose arbitrar, trajtimit mizor, torturës dhe vrasjes. Thaçi dhe Krasniqi u dënuan me nga 25 vite burg, Veseli me 18 vite dhe Selimi me 13 vite. Paneli i shpalli të katër të pafajshëm për akuzat për krime kundër njerëzimit. Elezi u shpreh se vendimi ka shkaktuar zhgënjim te një pjesë e shqiptarëve të Kosovës, të cilët, sipas tij, prisnin një proces që do të vendoste drejtësi në mënyrë të paanshme.
“Ne kemi pritur drejtësi. Ky vendim ka goditur popullin shqiptar, drejtësinë, NATO-n dhe SHBA-të, që ishin bashkë me ne në luftën për liri”, deklaroi ai. Eksperti tha se gjatë luftës kishte pasur, sipas tij, prani dhe monitorim ndërkombëtar në terren, duke përmendur përfaqësues të OSBE-së dhe NATO-s. Ai solli edhe përvojën e tij personale si pjesëtar i një njësie speciale, duke pretenduar se kishte pasur monitorim të veprimeve të UÇK-së.
Elezi shprehu gjithashtu dyshime për ndikime të jashtme mbi procesin gjyqësor, duke pretenduar se gjykata është prekur nga spiunazhi dhe ndërhyrjet nga jashtë. Këto janë vlerësime dhe pretendime të tij, ndërsa vendimi i gjykatës bazohet në provat e shqyrtuara gjatë një procesi që nisi në vitin 2023 dhe përfundoi me vendimin e 16 shtatorit 2026.
I pyetur nëse vendimi i Hagës mund të shndërrohet në një mjet për destabilizimin e Kosovës, Elezi tha se ai mund të përdoret politikisht nga aktorë të ndryshëm. “Kjo armë është përdorur kundër SHBA-ve. Ishin SHBA-të që punuan intensivisht për një Kosovë të lirë, të pavarur dhe demokratike”, u shpreh ai. Sipas ekspertit, përmes këtij procesi mund të synohet edhe dobësimi i rolit që SHBA-të kanë pasur në Kosovë dhe në rajon. Elezi e lidhi këtë me atë që ai e konsideron si përpjekje të shërbimeve të huaja serbe për të ndikuar në zhvillimet brenda Kosovës.
Ai tha se Kosova përballet edhe me sfida të tjera të sigurisë, duke përmendur luftën hibride, spiunazhin dhe krimet kibernetike.
