Atmosferë “kafkiane” në KLP

Procedura për zgjedhjen e Prokurorit të ri të Përgjithshëm po shoqërohet me një seri kërkesash për përjashtim, duke krijuar një situatë të pazakontë brenda Këshillit të Lartë të Prokurorisë.

Analisti dhe gazetari Lutfi Dervishi përmes një statusi në rrjetet sociale thekson se kandidati Ylli Pjetërnikaj ka kërkuar përjashtimin e anëtarit të KLP-së, Vatë Stakës. Nga ana tjetër, anëtari i Këshillit, Zeqir Hoda, ka kërkuar përjashtimin e kolegut Sokol Stojani.

Edhe Vatë Staka ka paraqitur kërkesë për përjashtimin e Zeqir Hodës, ndërsa kandidatja Arta Marku ka kërkuar përjashtimin e Sokol Stojanit.

Sipas Dervishit, procesi është përfshirë në një zinxhir kërkesash që prekin si kandidatët për postin e Prokurorit të Përgjithshëm, ashtu edhe vetë anëtarët që kanë rol në vlerësimin e tyre.

Situata është komentuar si një zhvillim me karakter “kafkian”, pasi ndërsa kandidatët kërkojnë përjashtimin e anëtarëve të KLP-së, edhe këta të fundit po kërkojnë përjashtimin e njëri-tjetrit.

“Atmosferë kafkiane në KLP

Procedura për zgjedhjen e Prokurorit të ri të Përgjithshëm po merr trajtat e një tregimi të Kafkës.

Kandidati Ylli Pjetërnikaj kërkon përjashtimin e anëtarit të KLP-së, Vatë Staka.

Anëtari i KLP-së Zeqir Hoda kërkon përjashtimin e kolegut Sokol Stojani.

Vatë Staka kërkon përjashtimin e kolegut Zeqir Hoda.

Kandidatja Arta Marku kërkon përjashtimin e Sokol Stojanit.

Me pak fjalë, kandidatët kërkojnë të përjashtohen ata që do t’i vlerësojnë, ndërsa ata që do t’i vlerësojnë kandidatët kërkojnë të përjashtojnë njëri-tjetrin.

Sot dhe nesër është pushim.

Të hënën nis java e re.

Me kandidatë të njëjtë, anëtarë të njëjtë dhe, me sa duket, kërkesa të reja për përjashtim.

Me këtë ritëm, procedura mund të përfundojë kur të mbetet vetëm një person në sallë.

Dhe ai do të duhet të vendosë nëse duhet të përjashtojë veten”, shkruan Lutfi Dervishi./ CNA