Qarkullimi i mjeteve me tonazh të rëndë në Urën e Matit, në aksin nacional Lezhë-Milot, është kufizuar nga Autoriteti Rrugor Shqiptar (ARRSH), në bashkëpunim me Policinë Rrugore.
Në të dyja anët e urës janë vendosur barriera betoni, me qëllim ndalimin e kalimit të automjeteve që tejkalojnë peshën e lejuar prej 13 tonësh.
Masa është ndërmarrë pas ndërhyrjes emergjente të kryer disa muaj më parë për përforcimin e themeleve të urës. Sipas monitorimeve në terren, pavarësisht sinjalistikës së vendosur, janë konstatuar raste të përsëritura të shkeljes së kufizimit nga automjetet e rënda.
Ndërkohë, përdorues të urës shprehen se struktura vijon të paraqesë probleme, duke ngritur edhe pikëpyetje mbi cilësinë e investimit të kryer.
ARRSH sqaron se kufizimi nuk lidhet me ndonjë cedim apo dëmtim të urës. Sipas autoritetit, bëhet fjalë për një masë parandaluese, e ndërmarrë për të mbrojtur ndërhyrjen e realizuar në themelet e strukturës dhe për të garantuar qëndrueshmërinë e saj në afat të gjatë.
Ura e Matit është një prej strukturave të rëndësishme në këtë aks rrugor dhe ka një gjatësi prej 844 metrash.
Për rikonstruksionin dhe përforcimin e saj u akordua një fond emergjent prej 107 milionë lekësh të reja, ndërsa punimet zgjatën rreth 8 muaj.