Një ngjarje e rëndë ka ndodhur paraditen e sotme në Tiranë, ku një 58-vjeçare ka humbur jetën pasi dyshohet se u godit me thikë nga bashkëshorti i saj.
Ngjarja ka ndodhur rreth orës 10:20 në rrugën “Panorama”, në një kompleks banimi pas shkollës “Harry Fultz”. Sipas Policisë, pas një konflikti në banesë, Hysni Patushi, 69 vjeç, dyshohet se ka goditur me mjet prerës bashkëshorten e tij, Lumturie Patushi, 58 vjeçe.
Gruaja u transportua me urgjencë në spital, por nuk mundi t’u mbijetojë plagëve të marra. Në momentin e ngjarjes, në banesë ndodhej edhe nipi 14-vjeçar i çiftit.
Pas krimit, bashkëshorti i viktimës është larguar nga vendngjarja dhe është shpallur në kërkim nga Policia. Sipas të dhënave paraprake, ai dyshohet se ka qenë nën efektin e alkoolit në momentin e ngjarjes.
Policia ka shoqëruar gjithashtu dhëndrin e autorit, ndërsa vijon puna për lokalizimin dhe kapjen e 69-vjeçarit.
Policia njoftoi: “Rreth orës 10:20, në rrugën “Panorama”, dyshohet se, pas një konflikti në banesë, shtetasi H. P., 68 vjeç, ka goditur me mjet prerës bashkëshorten e tij, shtetasen L. P., 58 vjeçe, e cila ka humbur jetën. Autori i dyshuar, shtetasi H. P., 68 vjeç, është larguar nga vendngjarja. Vijon puna për lokalizimin dhe kapjen e tij, si dhe për dokumentimin e plotë të rrethanave të ngjarjes”.
Grupi hetimor po vijon punën për të zbardhur plotësisht rrethanat e ngjarjes dhe motivin e konfliktit.